‘അവളെ പ്രേമിച്ചാണ് ഞാൻ റൊമാന്റിക് ആകാൻ പഠിച്ചത് ‘ ; മനസ് തുറന്ന് ടോവിനോ തോമസ്

മലയാള സിനിമയിലെ ഇപ്പോഴത്തെ റൊമാന്റിക് ഹീറോ അല്ലെങ്കിൽ റൊമാന്റിക് ബോയ് എന്നറിയപ്പെടുന്നത് ടോവിനോ തോമസിനെയാണ്. കാരണം എന്ന് നിന്റെ മൊയ്തീനിൽ തുടങ്ങി, ടോവിനോയുടേതായ ഏതൊരു ചിത്രം എടുത്താലും റൊമാൻസിന് ഒരു നാച്ചുറൽ ടച്ച് കൊണ്ട് വരാൻ ടോവിനോയ്ക്ക് സാധിച്ചിട്ടുണ്ട്.

അനീസ് കിച്ചണിൽ കഴിഞ്ഞ ദിവസം അതിഥിയായി എത്തിയത് ടോവിനോയാണ്. കുറച്ചു കുടുംബ വിശേഷങ്ങളും, സിനിമ വിശേഷങ്ങളും ആണ് താരം ഷോയിലൂടെ പങ്ക് വെച്ചത്. മുപ്പതു വയസ്സായ തന്നെ ചിലർ അങ്കിൾ എന്ന് വിളിക്കുന്നതിനെപ്പറ്റിയും താരം ഷോയിലൂടെ വ്യക്തമാക്കി. അങ്കിൾ എന്ന് വിളിക്കേണ്ട കാര്യം എന്തിനാ, ചേട്ടാ എന്നെങ്ങാനും വിളിച്ചാൽ പോരെ, എന്റെ മകളുടെ പ്രായം ഉള്ളവർ എന്നെ അങ്കിൾ എന്ന് വിളിച്ചാൽ കുഴപ്പം ഇല്ലെന്നും താരം പറയുന്നുണ്ട്.

മലയാള സിനിമയുടെ റൊമാന്റിക് ഹീറോ അല്ലേ ഇപ്പോൾ ടോവിനോ, അത് എത്രത്തോളം എന്ജോയ് ചെയ്തിട്ടുണ്ട് എന്ന് ആനി ചോദിക്കുമ്പോൾ ചാക്കോച്ചൻ കേൾക്കണ്ട എന്ന് പറഞ്ഞുകൊണ്ടാണ് താരം മറുപടി നൽകുന്നത്. ഞാൻ അത്യാവശ്യം റൊമാന്റിക്കാണ്. ഇപ്പോഴും അങ്ങനെയാണ്. ഞാൻ അവളെ പ്രേമിച്ചാണ് റൊമാന്റിക് ആകാൻ പഠിച്ചത്. എത്രത്തോളം ഞാൻ റൊമാന്റിക് ആയാൽ അവൾ എന്നെ പ്രേമിക്കും എന്ന് അന്ന് പ്രേമിച്ചു നടക്കുന്ന സമയത്ത് പഠിച്ചതാണ്. റൊമാന്റിക് ഹീറോ എന്ന ആ ലേബൽ താൻ ഒരുപാട് ഇഷ്ടപ്പെടുന്നുണ്ട് ആസ്വദിക്കുന്നുണ്ട് എന്നും താരം വ്യക്തമാക്കി.