പ്രാദേശികഭാഷയിലെ ഓസ്കര്‍ എന്നറിയപ്പെടുന്ന ഫിലിംഫെയര് പുരസ്കാരങ്ങൾ ചെന്നെയിൽ വിതരണം ചെയ്യുകയാണ്. അറുപത്തിയാറാമത് ഫിലിംഫെയര് പുരസ്കാരങ്ങൾ നേടിയ മലയാള താരങ്ങളെല്ലാം തന്നെ ഏറെ സന്തോഷത്തിലാണ്. ചെന്നൈ ജവഹര്‍ലാൽ നെഹ്റു സ്റ്റേഡിയത്തിൽ നടക്കുന്ന പുരസ്കാര വിതരണച്ചടങ്ങ് മൂന്ന് ദിവസം നീളും. 2019ൽ സ്ക്രീനിൽ തിളങ്ങിയ താരങ്ങൾക്കാണ് പുരസ്കാരം. തെന്നിന്ത്യൻ ഭാഷകളിലെ മിന്നും താരങ്ങളുടെ സംഗമവേദി കൂടിയാണ് ഫിലിംഫെയര് പുരസ്കാര വേദി. കൂടെ എന്ന ചിത്രത്തിലെ പ്രകടനത്തിന് മികച്ച നടനുള്ള പുരസ്കാരം പൃഥ്വിരാജ് സ്വന്തമാക്കിയപ്പോൾ മികച്ച നടിക്കുള്ള പുരസ്കാരം സ്വന്തമാക്കിയത് ഐശ്വര്യ ലക്ഷ്മിയാണ്. വരത്തനിലെ പ്രകടനം കണക്കാക്കിയാണ് ഈ പുരസ്കാരം. മികച്ച ചിത്രമായി തെരഞ്ഞെടുത്തത് സുടാനി ഫ്രം നൈജീരിയയാണ്.
ജോസഫ് എന്ന ചിത്രത്തിലെ പ്രകടനത്തിന് ജോജു ജോര്‍ജ്ജിനാണ് മികച്ച ലീഡിങ് നടനുള്ള പുരസ്കാരം ലഭിച്ചിരിക്കുന്നത്. ആമിയിലെ പ്രകടനത്തിന് മഞ്ജു വാര്യരും മികച്ച ലീഡിങ് നടിക്കുള്ള പുരസ്കാരം കരസ്ഥമാക്കി. മികച്ച നടനുള്ള ക്രിട്ടിക്സ് അവാര്‍ഡ് സൗബിൻ കരസ്ഥമാക്കിയപ്പോൾ മികച്ച നടിയ്ക്കുള്ള ക്രിട്ടിക്സ് അവാര്‍ഡ് ഈടയിലെ അവിസ്മരണീയ പ്രകടനത്തിന് നടി നിമിഷയും നേടിയെടുത്തു.
ക്വീനിലെ മികച്ച പ്രകടനം കണക്കാക്കി നവാഗത നായികയ്ക്കുള്ള പുരസ്കാരം കരസ്ഥമാക്കിയത് സാനിയ ഇയ്യപ്പനാണ്. ഈമയൗ സംവിധാനം ചെയ്തത് പരിഗണിച്ച് ലിജോ ജോസ് പെല്ലിശ്ശേരിയ്ക്ക് മികച്ച സംവിധായകനുള്ള പുരസ്കാരവും മികച്ച സഹതാരമായി വിനായകനെയും (ഈ.മ.യൗ) തെരഞ്ഞെടുത്തു. സുഡാനി ഫ്രം നൈജീരിയ എന്ന ചിത്രത്തിലെ പ്രകടനത്തിന് നടി സാവിത്രി ശ്രീധരൻ മികച്ച സഹനടിക്കുള്ള പുരസ്കാരം കരസ്ഥമാക്കി.
തീവണ്ടിയിലെ ഹിറ്റ് ഗാനമായ ജീവാംശമായ് എന്ന ഗാനമൊരുക്കിയ കൈലാസ് മേനോൻ മികച്ച മ്യൂസിക്ക് ആൽബത്തിനുള്ള പുരസ്കാരം സ്വന്തമാക്കിയപ്പോൾ ജോസഫ് എന്ന ചിത്രത്തിലെ പൂമുത്തോളേ എന്ന ഗാനമാലപിച്ച വിജയ് യേശുദാസ് മികച്ച ഗായകനുള്ള പുരസ്കാരം സ്വന്തമാക്കി. തെലുങ്ക്, തമിഴ്, കന്നഡ സിനിമാ മേഖലയിൽ നിന്നും നിരവധി പേരാണ് ചടങ്ങിൽ സംബന്ധിച്ചത്. പരിപാടി ഏഷ്യാനെറ്റ് ചാനലിൽ ഉടൻ സംപ്രേക്ഷണം ചെയ്യും.
Post Your Comments