ആരാധകര്‍ ഏറെ കാത്തിരുന്ന മമ്മൂട്ടി ചിത്രമാണ് മാമാങ്കം. ഇന്നലെ തിയേറ്ററുകളിലെത്തിയ ചിത്രം ആദ്യ ദിനം തന്നെ 23 കോടിയ്ക്കു മുകളിലാണ് നേടിയത്. ലോകവ്യാപകമായി 2000 ന് മുകളില്‍ സ്ക്രീനുകളില്‍ പ്രദര്‍ശനത്തിനെത്തിയ ചിത്രത്തെ വന്‍ വരവേല്‍പ്പോടെയാണ് ആരാധകര്‍ സ്വീകരിച്ചത്.
അത്ഭുതങ്ങള്‍ നിറഞ്ഞതും മലയാളികള്‍ക്ക് വളരെ പുതുമയുള്ളതുമായി ഈ വിസ്മയ സിനിമയെ നശിപ്പിക്കാന്‍ പലരും ശ്രമിക്കുന്നുണ്ടെങ്കിലും ഞങ്ങളതിനെ പുച്ഛത്തോടെ തള്ളിക്കളയുന്നുവെന്നായിരുന്നു ചിത്രത്തിന്‍റെ വിജയത്തെ കുറിച്ച് നിര്‍മ്മാതാവ് വേണു കുന്നപ്പള്ളി പറഞ്ഞത്. ഫേസ് ബുക്കിലൂടെയായിരുന്നു അദ്ദേഹത്തിന്റയെ പ്രതികരണം.
”ഇന്നലെ ആ സുദിനമായിരുന്നു. മാമാങ്കം എന്ന സ്വപ്നം നിങ്ങളുടെ മുന്നിലേക്കെത്തി. ഏകദേശം രണ്ടുവർഷമായുള്ള യാത്രയായിരുന്നു. ഉദ്യോഗ ജനകവും, രസകരവും, വെട്ടിമാറ്റേണ്ടതിനെ മാറ്റിയും തന്നെ ആയിരുന്നു ആ യാത്ര. ലോകവ്യാപകമായി ജനങ്ങൾ വളരെ ആവേശത്തോടെയാണ് ഈ സിനിമയെ ഏറ്റെടുത്തിരിക്കുന്നത്. ഇന്നലെ കുറെ സിനിമാ തിയേറ്ററുകളിൽ ഞങ്ങൾ വിസിറ്റ് ചെയ്തു…റിലീസ് ചെയ്ത ഏകദേശം 2000 സെൻടറുകളിൽ നിന്നുള്ള റിപ്പോർട്ടുകൾ ആവേശഭരിതമാണ്. വെളുപ്പിന് വരെയുള്ള അവൈലബിൾ റിപ്പോർട്ടുകളനുസരിച്ച് ലോകവ്യാപകമായി ഉള്ള കളക്ഷൻ ഇപ്പോൾ തന്നെ ഏകദേശം 23 കോടിക്ക് മുകളിലാണ്”, വേണു പറയുന്നു.
”ആയിരക്കണക്കിന് ആളുകളുടെ അധ്വാനമാണ് ഈ സിനിമ. കോടിക്കണക്കിനു രൂപയുടേയും. ഈ സിനിമയുടെ വിജയത്തിനായി എന്നോടൊപ്പം നിന്ന എല്ലാവരെയും ഈ നിമിഷത്തിൽ ഞാൻ ഓർക്കുന്നു. അതുപോലെ ഷൂട്ടിംഗ് മുതൽ, ഇന്നലെ സിനിമ ഇറങ്ങുന്ന നിമിഷങ്ങൾ വരെ അതിനെ മുടക്കാൻ പ്രവർത്തിച്ച ആളെയും ഞാൻ മറക്കുകയില്ല. കൂലിയെഴുത്തുകാർ അവരുടെ ജോലി തുടരട്ടെ. ഈ സിനിമ, ഭാവിയിൽ മലയാളത്തിൽ വരാൻ പോകുന്ന മെഗാ പ്രോജക്ടുകള്‍ക്ക് ഉത്തേജകമായിരിക്കും”.
Post Your Comments