കഴിഞ്ഞ കുറെ ദിവസങ്ങളായി തമിഴ്നാട് രാഷ്ട്രീയ കളരിയിൽ ചുവടുറപ്പിക്കാനുള്ള ബി ജെ പിയുടെ നീക്കങ്ങൾ പ്രത്യക്ഷത്തിൽ തന്നെ പ്രകടമാണ്. പണ്ട് മുതൽക്കേ തന്നെ, തമിഴ്‌നാട്ടിലെ ഭരണകൂടത്തിൽ സിനിമ മേഖലയിൽ പ്രശസ്തമായവരുടെ വലിയ സാന്നിധ്യമാണുള്ളത്. ബി ജെ പിയും അത്തരത്തിലൊരു നീക്കത്തിലേക്ക് കടക്കുകയാണ്. കഴിഞ്ഞ ദിവസം ബി ജെ പിയിൽ ചേർന്ന പ്രമുഖ കോളിവുഡ് നടന്‍ രാധാ രവിക്ക് പിന്നാലെ ഇപ്പോഴിതാ, തെന്നിന്ത്യന്‍ ഐറ്റം ഡാൻസ് നടി നമിതയും ബിജെപിയില്‍ ചേര്‍ന്നിരിക്കുകയാണ് . ശനിയാഴ്ച വൈകീട്ടായിരുന്നു പാര്‍ട്ടി വര്‍ക്കിങ്ങ് പ്രസിഡന്‍റ് ജെപി നദ്ദയാണ് നടിയുടെ പാര്‍ട്ടി പ്രവേശം ഔദ്യോഗികമായി അറിയിച്ചത്. എന്നാൽ, ഇന്നലെ രാവിലെയായിരുന്നു രാധാ രവി പാർട്ടിയിൽ ചേർന്നത്.
ദക്ഷിണേന്ത്യൻ സിനിമകളില്‍ ഏറെ സജീവമായിരുന്ന നമിത 2016 ല്‍ മോഹൻലാൽ നായകനായ മലയാള സിനിമ പുലിമുരുകനിലും അഭിനയിച്ചിട്ടുണ്ട്. 2017 ല്‍ ബിഗ് ബോസ് തമിഴിന്‍റെ ഒന്നാം സീസണ്‍ അവര്‍ മത്സരാര്‍ഥിയായിരുന്നു. 2008 ല്‍ ആരാധകര്‍ നമിതയുടെ പേരില്‍ കോയമ്പുത്തൂരില്‍ ഒരു ക്ഷേത്രം നിര്‍മ്മിച്ചത് വലിയ വിവാദമായിരുന്നു.
തമിഴ് നാടിൽ വരാനിരിക്കുന്ന തദ്ദേശ തിരഞ്ഞെടുപ്പില്‍ എഐഎഡിഎംകെയുമായി സഖ്യം ചേർന്ന് മത്സരിക്കണോ, ഒരൊറ്റ കക്ഷിയായി തിരഞ്ഞെടുപ്പിനെ നേരിടണമോയെന്നതുമായി ബന്ധപ്പെട്ട് ചർച്ച ചെയ്തു വരുന്നതായി, മുതിര്‍ന്ന ബിജെപി നേതാക്കൾ അറിയിച്ചിരുന്നുവെന്ന് ദേശീയ മാധ്യമങ്ങൾ റിപ്പോർട്ട് ചെയ്തു. അതേസമയം, എഐഎഡിഎംകെയുമായി സഖ്യം തുടരണമെന്ന ആവശ്യമാണ് യോഗത്തില്‍ ഉയര്‍ന്നു നില്കുന്നുവെന്നാണ് സൂചന.
Post Your Comments