മമ്മൂട്ടി – ജോഷി – ലോഹിതദാസ് ടീം ‘മഹായാനം’, ‘കൗരവര്‍’ തുടങ്ങിയ ഹിറ്റ് ചിത്രങ്ങള്‍ പ്രേക്ഷകര്‍ക്ക് സമ്മാനിച്ചുവെങ്കിലും ഇവരുടെ ടീമില്‍ പുറത്തിറങ്ങിയ ഒരു ചിത്രം അപ്രതീക്ഷിതമായി പരാജയപ്പെട്ടിരുന്നു. അന്നത്തെ പതിവ് മമ്മൂട്ടി കഥാപാത്രങ്ങളില്‍ നിന്ന് മാറി ഹ്യൂമര്‍ ട്രാക്കില്‍ മമ്മൂട്ടി സരസമായി അഭിനയിച്ച സിനിമയായിരുന്നു ലോഹിതദാസ് രചന നിര്‍വഹിച്ച ‘കുട്ടേട്ടന്’. 1990-ല്‍ പുറത്തിറങ്ങിയ ‘കുട്ടേട്ടന്’ പ്രതീക്ഷളോടെ റിലീസിന് എത്തിയ മമ്മൂട്ടി ചിത്രമായിരുന്നു. ‘കുട്ടേട്ടന്’ ഇറങ്ങിയ മുന്‍ വര്‍ഷം ജോഷി – മമ്മൂട്ടി – ലോഹിതദാസ് കൂട്ടുകെട്ടില്‍ പുറത്തിറങ്ങിയ ‘മഹായാനം’ വലിയ രീതിയില്‍ ശ്രദ്ധിക്കപ്പെട്ടിരുന്നു. ‘കുട്ടേട്ടന്’ ശേഷം ജോഷി-മമ്മൂട്ടി-ലോഹിതദാസ് കൂട്ടുകെട്ടില്‍ പുറത്തിറങ്ങിയ ‘കൗരവ’റും ബോക്സോഫീസില്‍ അത്ഭുത വിജയം നേടിയിരുന്നു.
താന്‍ ഒരു സീനില്‍ അഭിനയിക്കാനായി കോട്ടയത്തെ കുറവിലങ്ങാട്ടെ വീട്ടില്‍ നിന്ന് കൊടെക്കനാല്‍ വരെ പോയി സഹകരിച്ച ചിത്രമാണ്‌ ‘കുട്ടേട്ടന്’ എന്ന് നടന്‍ ബാബുനമ്പൂതിരി പറയുന്നു. പക്ഷെ ചിത്രം ബോക്സോഫീസില്‍ വിജയമാകാതിരുന്നത് തനിക്ക് വേദനയുണ്ടാക്കിയെന്നും ബാബു നമ്പൂതിരി പറയുന്നു. തനിക്ക് ലൈഫില്‍ കടപ്പാടുള്ള മനുഷ്യനാണ് സംവിധായകന്‍ ജോഷി എന്നും ഒരു ടിവി ചാനല്‍ അഭിമുഖ പരിപാടിയില്‍ സംസാരിക്കവേ ബാബു നമ്പൂതിരി വ്യക്തമാക്കി.
Post Your Comments