എന്നെ ഒരുപാട് ആനന്ദിപ്പിച്ച ചിത്രീകരണമായിരുന്നു: തൊട്ടപ്പനെ ചേര്‍ത്ത് പിടിച്ച് രഘുനാഥ് പലേരി

കിസ്മത്തിനു ശേഷം ഷാനവാസ് ബാവക്കുട്ടി ഒരുക്കുന്ന രണ്ടാമത് ചിത്രമാണ്‌ തൊട്ടപ്പന്‍, വിനായകന്‍ കേന്ദ്ര കഥാപാത്രമായി എത്തുന്ന ചിത്രത്തിന്റെ പുതിയ പോസ്റ്റര്‍ സോഷ്യല്‍ മീഡിയയില്‍ ശ്രദ്ധ നേടിക്കഴിഞ്ഞു, പ്രമുഖ ചെറുകഥാകൃത്തും സിനിമാ രചയിതാവുമായ രഘുനാഥ് പലേരിയും ചിത്രത്തില്‍ ഒരു വേഷം ചെയ്യുന്നുണ്ട്, തൊട്ടപ്പന്റെ ചിത്രീകരണ വിശേഷണങ്ങളെക്കുറിച്ച് അദ്ദേഹം തന്റെ ഫേസ്ബുക്ക് പോസ്റ്റില്‍ ഇങ്ങനെ കുറിച്ചു…

രഘുനാഥ് പലേരിയുടെ ഫേസ്ബുക്ക് പോസ്റ്റ്‌

ഷാനവാസ് ബാവക്കുട്ടിയുടെ തൊട്ടപ്പന്റെ പുതിയ പോസ്റ്റർ.
തോട്ടപ്പനോട് എനിക്കൊരു ഉൾചങ്ങാത്തം ഉണ്ട്. എന്നെ ഒരുപാട്
ആനന്ദിപ്പിച്ച ചിത്രീകരണമായിരുന്നു തോട്ടപ്പൻ സിനിമയുടെത്.
ചില ദിവസങ്ങളിൽ രാത്രിയും പകലും അവർ തമ്പടിച്ച തുരുത്തിൽ
ഞാനും മനസ്സും മാടിക്കെട്ടി കറങ്ങി നടന്നിരുന്നു. രാത്രിയിൽ നിലാവ്
പുരളുന്ന തുരുത്തിലെ കരയും ചുറ്റുമുള്ള ജലവും ഉന്മാദ ഭാവം പ്രസരിപ്പിക്കുന്നത് കണ്ടിട്ടുണ്ട്. തുരുത്തിലെ അറ്റം കാണാ വരമ്പിൽ തനിയെ ഒരിടത്ത് നിൽക്കണം. ഭയത്തിന്റെ നൂലുകൾ മനസ്സിൽ ഇല്ലെങ്കിൽ നിലാവ് നമ്മോട് ഒട്ടി നിൽക്കും. പ്രകൃതിക്ക് ഭംഗി കൂടുതൽ രാത്രിയിലാണ്.

പിഎസ് റഫീക്ക് രചന നിര്‍വഹിക്കുന്ന ചിത്രം ഈദ് റിലീസായി പ്രദര്‍ശനത്തിനെത്തും. വിനായകന്‍ കുഞ്ഞിനെ എടുത്തുയര്‍ത്തി  താലോലിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ നേരത്തെ തന്നെ സോഷ്യല്‍ മീഡിയയില്‍ ശ്രദ്ധനേടിയിരുന്നു.