ഒരു സിനിമാ പ്രമോഷന്‍ പരിപാടിക്കിടെ തിയറ്ററില്‍ പ്രദര്‍ശിപ്പിക്കുന്ന തന്റെ തന്നെ മറ്റൊരു ചിത്രമായ രണം പരാജയമാണെന്ന് പറഞ്ഞതിന്റെ പേരില്‍ വിമര്‍ശനത്തിനു ഇരയായിരിക്കുകയാണ് നടന്‍ പൃഥിരാജ്. താരത്തെ വിമര്‍ശിച്ചു കൊണ്ട് നേരത്തെ ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിച്ച നടന്‍ റഹ്മാന്‍ രംഗത്ത് എത്തിയിരുന്നു. എന്നാല്‍ ഇപ്പോള്‍ പൃഥ്വിരാജിനെതിരെ വിമര്‍ശനവുമായി രണത്തിന്റെ നിർമാതാക്കളിൽ ഒരാളായ ബിജു ലോസൺ രംഗത്ത്.
തിയറ്ററുകളിൽ ഇപ്പോഴും ഓടിക്കൊണ്ടിരിക്കുന്ന സിനിമയെക്കുറിച്ച് ഇങ്ങനെ പറയാൻ പാടില്ലായിരുന്നുവെന്നും ഈ ചിത്രം പരീക്ഷണമായിരുന്നെങ്കില്‍ അദ്ദേഹം സ്വന്തം പണം മുടക്കി അത് നിര്‍മിക്കണമായിരുന്നുവെന്നും ബിജു പറഞ്ഞു. റഹ്മാന്‍ ഫെയ്സ്ബുക്കില്‍ നടത്തിയ പ്രതികരണത്തിന് താഴെ നടന്ന ചര്‍ച്ചയിലാണ് ബിജു ലോസണിന്റെ പ്രതികരണം. പൃഥ്വി പറഞ്ഞത് വസ്തുതയാണെന്നും ചിത്രം ഗംഭീരമാണെന്നതില്‍ സംശയമില്ലെന്നും പക്ഷേ പ്രേക്ഷക പ്രതികരണം ശരാശരി ആയിരുന്നുവെന്നും ഒരു പ്രേക്ഷകന്‍ ബിജു ലോസണെ ടാഗ് ചെയ്തുകൊണ്ട് അഭിപ്രായപ്പെടുകയുണ്ടായി. ഈ കമന്റിന് മറുപടി നൽകിയാണ് ബിജു തന്റെ നിലപാട് വ്യക്തമാക്കിയത്
Post Your Comments