വിവാഹത്തോടെ സിനിമയില്‍ നിന്നും പിന്മാറിയ ജനപ്രിയ നടി മഞ്ജുവാര്യര്‍ നീണ്ട പതിനാല് വര്‍ഷത്തെ ഇടവേളയ്ക്ക് ശേഷം തിരിച്ചെത്തുകയും വിജയ ചിത്രങ്ങളുടെ ഭാഗമായി ലേഡി സൂപ്പര്‍സ്റ്റാര്‍ പദവി നേടുകയും ചെയ്തിരിക്കുകയാണ്. മലയാളികളുടെ പ്രിയ നടി മഞ്ജുവാര്യരുടെ തിരിച്ചു വരവ് ആഘോഷമാക്കിയ ചിത്രമാണ് ‘ഹൗ ഓള്‍ഡ് ആര്‍ യൂ?’. മലയാളത്തിനു പുറമേ തമിഴിലും ഹിന്ദിയിലും ഈ ചിത്രം റീമേക്ക് ചെയ്തു. മഞ്ജുവിന്റെ തിരിച്ചു വരവിനു കാലം ഒരുക്കിയ ഈ ചിത്രത്തെക്കുറിച്ചും താരം എങ്ങനെ ഈ ചിത്രത്തിലേയ്ക്ക് എത്തിയെന്നും സംവിധായകന്‍ റോഷന്‍ ആന്‍ഡ്രൂസ് ഒരു മാധ്യമത്തിനു നല്‍കിയ അഭിമുഖത്തില്‍ വെളിപ്പെടുത്തുന്നു.
മോഹന്‍ലാലിന്റെ വിസ്മയ ചിത്രം ഒടിയന്‍ ഒരുക്കുന്ന സംവിധായകന്‍ ശ്രീകുമാര്‍ മേനോനാണ് മഞ്ജു സിനിമയിലേയ്ക്ക് മടങ്ങി വരാനൊരുങ്ങുന്നു എന്ന കാര്യം തന്നെ അറിയിച്ചതെന്നും കാര്യമറിയാന്‍ ദിലീപിനെ താന്‍ വിളിച്ചിരുന്നുവെന്നും റോഷന്‍ പറയുന്നു. എന്നാല്‍ അദ്ദേഹം ഫോണ്‍ എടുത്തിരുന്നില്ല. ഇതിനെക്കുറിച്ച് ദിലീപിന് മെസേജും അയച്ചിരുന്നു. എന്നാല്‍ അദ്ദേഹം അതിനും മറുപടി നല്‍കിയിരുന്നില്ല. അതിനെ തുടര്‍ന്ന് മഞ്ജുമായി ബന്ധപ്പെട്ടത് ശ്രീകുമാര്‍ മേനോനിലൂടെയായിരുന്നുവെന്നും സംവിധായകന്‍ കൂട്ടിച്ചേര്‍ത്തു.
ശ്രീകുമാര്‍ മേനോനെ വിളിച്ച് മഞ്ജുവുമായിട്ട് അപ്പോയ്‌മെന്‍റ് എടുക്കാന്‍ ആവശ്യപ്പെട്ടു. തുടര്‍ന്ന് അദ്ദേഹം വിളിച്ചു പറയുകയും മഞ്ജുവിനെ കാണാന്‍ സാധിക്കുകയും ചെയ്തു. മഞ്ജുവിന്റെ അടുത്തുപോയി കഥ പറയുകയും അവര്‍ സിനിമ ചെയ്യാന്‍ സമ്മതം അറിയിക്കുകയും ചെയ്തു. ശ്രീകുമാര്‍ മേനോന്‍ വിളിച്ചു പറഞ്ഞത് കൊണ്ടാണ് മഞ്ജുവിനെ കാണാനും സംസാരിക്കാനും പറ്റിയതെന്നും അഭിമുഖത്തില്‍ റോഷന്‍ പറയുന്നു.
Post Your Comments