ആഡംബര കാറിൽ നിന്നും പാസ്റ്റിക് മാലിന്യം വലിച്ചെറിഞ്ഞ യുവാവിനെ പിന്തുടർന്ന് ശകാരിച്ച നടി അനുഷ്കയുടെ വീഡിയോ സമൂഹ മാധ്യമങ്ങളിൽ തരംഗമായി. എന്നാൽ സംഭവത്തിൽ വൻ ട്വിസ്റ്റാണ് ഇപ്പോൾ ഉണ്ടായിരിക്കുന്നത്. മുംബൈ യാത്രയ്ക്കിടെയാണ് റോഡിലേക്ക് മാലിന്യം വലിച്ചെറിയുന്നത് ശ്രദ്ധയില്‍പ്പെട്ട അനുഷ്ക പ്രതികരിച്ചത്. ഇത് ഷൂട്ട് ചെയ്ത ഭർത്താവ് വിരാട് സമൂഹ മാധ്യമങ്ങളിലൂടെ പങ്കുവയ്ക്കുകയും ചെയ്തു. ഇവരുടെ ‘ശാസന’ ഏറ്റുവാങ്ങേണ്ടി വന്ന മുംബൈ സ്വദേശിയായ അര്‍ഹാന്‍ സിങ് അനുഷ്‌കയുടെയും കോഹ്ലിയുടെയും ‘മോശം’ പെരുമാറ്റത്തെപ്പറ്റി സമൂഹമാധ്യമത്തില്‍ കുറിപ്പുമായി രംഗത്തെത്തി യിരിക്കുകയാണ്.
യാതൊരു മൈലേജും പ്രതീക്ഷിച്ചല്ല ഈ പോസ്റ്റ് കുറിക്കുന്നതെന്നു ആമുഖമായി പറഞ്ഞുകൊണ്ട് ആരംഭിക്കുന്ന അര്‍ഹാന്റെ കുറിപ്പിൽ താരങ്ങൾക്കെതിരെ വലിയ വിമർശനമാണ് നടക്കുന്നത്. ‘യാത്രയ്ക്കിടെ ശ്രദ്ധയില്ലായ്മ കൊണ്ട് ഒരു ചതുരശ്ര മില്ലി മീറ്ററിന്റെ പ്ലാസ്റ്റിക് മലിനീകരണത്തിനു ഞാന്‍ കാരണക്കാരനായി. എന്റെ സമീപത്തു കൂടി ഒരു കാര്‍ പോകുന്നുണ്ടായിരുന്നു. പതിയെ അതിന്റെ വിന്‍ഡോ താഴ്ന്നു, അവിടെ നിന്നതാ സുന്ദരിയായ അനുഷ്ക ശര്‍മ. അവര്‍ എനിക്കു നേരെ ഒച്ചയുയര്‍ത്തുകയും ആക്രോശിക്കുകയും ചെയ്യുന്നു. അതും ഭ്രാന്തു പിടിച്ചതു പോലെ.
എന്റെ ശ്രദ്ധയില്ലായ്മയ്ക്ക് ഞാന്‍ മാപ്പു പറയാനൊരുക്കമായിരുന്നു. ഒരല്‍പം മാന്യതയും മര്യാദയും നിങ്ങളുടെ വാക്കുകളിലുണ്ടായിരുന്നെങ്കില്‍ അനുഷ്‌കയുടെയും കോഹ്ലിയുടെയും സ്റ്റാര്‍ വാല്യു കുറഞ്ഞു പോകുമായിരുന്നോ! പലതരത്തിലുള്ള പെരുമാറ്റ മര്യാദകളും ശുചിത്വബോധവുമൊക്കെയുണ്ട്. വാക്കുകള്‍ ഉപയോഗിക്കുമ്ബോഴുള്ള മര്യാദ അതിലൊന്നാണ്!
എന്റെ ലക്ഷ്വറി കാറില്‍ നിന്ന് അബദ്ധവശാല്‍ താഴെ വീണ മാലിന്യത്തേക്കാള്‍ വലുതാണ് നിങ്ങളുടെ വായില്‍ നിന്നു വന്ന വാക്കുകളും നിങ്ങളുടെ ലക്ഷ്വറി കാറില്‍ നിന്നു കണ്ട കാഴ്ചയും. പിന്നെ കണ്ടതെല്ലാം ഷൂട്ട് ചെയ്ത് പോസ്റ്റ് ചെയ്ത വിരാട് കോഹ്ലിയുടെ വൃത്തികെട്ട മനസ്സും. അതെന്തു നേട്ടത്തിനു വേണ്ടി ചെയ്തതാണെങ്കിലും ഇപ്പോഴാണ് സംഭവം യഥാര്‍ത്ഥത്തില്‍ കുപ്പത്തൊട്ടിയ്ക്കു സമാനമായതെന്നും അര്‍ഹാന്‍ പറയുന്നു.
ഒട്ടേറെ പേര്‍ ഇദ്ദേഹത്തിനു പിന്തുണയുമായും രംഗത്തെത്തിയിരിക്കുകയാണ്. പരിസര മലിനീകരണം ഇല്ലാതാക്കണമെങ്കില്‍ ആദ്യം കാറില്‍ നിന്നിറങ്ങി പൊതു ഗതാഗത സംവിധാനത്തെ ആശ്രയിക്കൂവെന്നും കാറിനകത്തെ എസി ഓഫാക്കി ഭൂമിയെ രക്ഷിക്കാനും താരങ്ങളോട് ചിലർ പറയുന്നുണ്ട്.
read also: ആഡംബര കാറിലെത്തി റോഡില്‍ മാലിന്യം നിക്ഷേപിച്ച യുവാവിനെതിരെ നടി അനുഷ്ക; വീഡിയോ
Post Your Comments