ഒരിക്കല്‍ മാത്രം കണ്ട എനിക്ക് പോലും അദ്ദേഹത്തിന്റെ വിയോഗ വാര്‍ത്ത വലിയ ഞെട്ടലുണ്ടാക്കി; മമ്മൂട്ടിയുടെ വികാരനിർഭരമായ കുറിപ്പ്

പ്രശസ്ത പാചക വിദഗ്ദനും, ടെലിവിഷന്‍ ഹോസ്റ്റുമായ ആന്റണി ബോര്‍ദൈനിന്റെ ആത്മഹത്യ ആരാധകരെ ഞെട്ടിച്ചിരിക്കുകയാണ്. സി എന്‍ എന്നിലെ തന്റെ പുതിയ ഷോ ആയ ‘പാര്‍ട്‌സ് അണ്‍നോണി’ന്റെ ഷൂട്ടിംഗുമായി ബന്ധപ്പെട്ട് ഫ്രാന്‍സിലെത്തിയ താരം സ്ട്രാസ്‌ബോഗ് നഗരത്തിലെ ഹോട്ടല്‍ മുറിയില്‍ മരിച്ച നിലയില്‍ കാണപ്പെടുകയായിരുന്നു. 61 വയസ്സായിരുന്നു. ആന്റണി ബോർദൈന്‍റെ മരണ വാര്‍ത്ത വന്നതിനു പിന്നാലെ അദ്ദേഹത്തെക്കുറിച്ചുള്ള ഓര്‍മ്മകള്‍ പങ്കുവച്ചുകൊണ്ട് മലയാളത്തിന്റെ മെഗാസ്റ്റാര്‍ മമ്മൂട്ടി.

മമ്മൂട്ടിയുടെ ഫെയ്സ്ബുക്ക് കുറിപ്പ് വായിക്കാം:

“ആന്റണി ബോര്‍ദൈനെ ആദ്യം കാണുന്നത് ‘പോക്കിരിരാജ’യുടെ ഷൂട്ടിംഗ് സമയത്താണ്. എന്റെ കുടുംബാംഗങ്ങള്‍ക്ക് അദ്ദേഹത്തിന്റെ ടി വി പ്രോഗ്രാമുകള്‍ പരിചയമായിരുന്നത്ര പരിചയമില്ലായിരുന്നു അവയെക്കുറിച്ചെനിക്ക്. അദ്ദേഹത്തെ കണ്ടതും ഒപ്പം നടത്തിയ ഷൂട്ടിംഗും എന്റെ വീട്ടിലെ പുട്ടും സ്നേഹത്തോടെ ആന്റണി കഴിച്ചതുമെല്ലാം ഓര്‍മ്മയില്‍ വരുന്നു. അന്ന് മുതല്‍ ഞാന്‍ ആന്റണി ബോര്‍ദൈനിന്റെ ടി വി പ്രോഗ്രാമുകളായ ‘നോ റിസര്‍വേഷന്‍സ്’, ‘പാര്‍ട്സ് അണ്‍നോണ്‍’ എന്നിവ മുടങ്ങാതെ കാണുമായിരുന്നു. വിവിധ ഭക്ഷണ രീതികളേയും സംസ്ക്കാരങ്ങളെയും ഷോ കേസ് ചെയ്ത് കൊണ്ട് വിവിധ ലോകങ്ങളെ അടുപ്പിക്കുകയായിരുന്നു ആന്റണി ബോര്‍ദൈന്‍.

പിന്നീട് അമേരിക്കയില്‍ പോയപ്പോള്‍ അദ്ദേഹത്തിന്റെ മുഴുവന്‍ ടീം അംഗങ്ങളും ചേര്‍ന്ന് സ്വീകരിച്ചു, വളരെ സ്നേഹത്തോടെ അവിടെയെല്ലാം ചുറ്റി നടന്നു കാണിച്ചു. ആന്റണി ബോര്‍ദൈന്‍ എനിക്കൊപ്പം നടത്തിയ ഷൂട്ടിംഗ് ചിത്രങ്ങളുള്ള മലയാള പത്രക്കുറിപ്പുകള്‍ പതിച്ച ആ ഓഫീസിന്റെ ചുമരുകള്‍ കണ്ടു എനിക്ക് അഭിമാനം തോന്നി.

ഒരിക്കല്‍ മാത്രം കണ്ട എനിക്ക് പോലും അദ്ദേഹത്തിന്റെ വിയോഗ വാര്‍ത്ത വലിയ ഞെട്ടലുണ്ടാക്കി. അത്രയ്ക്കായിരുന്നു ആന്റണി ബോര്‍ദൈന്‍ ഷോകള്‍ ലോകത്ത് ഉണ്ടാക്കിയ പ്രഭാവം. നിങ്ങളില്ലാത്ത ലോകത്തെ ‘Better Place’ എന്ന് വിളിക്കാനാവില്ലല്ലോ ബോര്‍ദൈന്‍…”

‘നോ റിസര്‍വേഷന്‍സ്’ എന്ന തന്റെ ടെലിവിഷന്‍ സീരീസുമായി ബന്ധപ്പെട്ടു കേരളത്തില്‍ എത്തിയ ആന്റണി ബോര്‍ദൈന്‍ മലയാളത്തിന്റെ മെഗാസ്റ്റാറിനെ അടുത്തറിയുന്നത് പോക്കിരിരാജയുടെ ലൊക്കേഷനിൽ വച്ചായിരുന്നു.

ഭക്ഷണം, സിനിമ, യാത്ര, ജീവിത ശൈലി തുടങ്ങി ഒരു പിടി വിഷയങ്ങൾ മമ്മൂട്ടി–ആന്റണി ബോര്‍ദൈന്‍ കൂടിക്കാഴ്ചയിൽ വിഷയങ്ങളായി. കേരളത്തിലെ സ്ട്രീറ്റ് ഫുഡ്‌ വിശ്വസിച്ചു ധൈര്യമായി കഴിക്കാം എന്ന് ഉറപ്പു കൊടുക്കുത്തു കൊണ്ടാണ് മമ്മൂട്ടി ആന്റണി ബോര്‍ദൈനുമായുള്ള സംഭാഷണം ആരംഭിക്കുന്നത്. ഫൈവ് സ്റ്റാര്‍ ഹോട്ടലില്‍ നമ്മള്‍ പാചകം ചെയ്തു കഴിഞ്ഞ ഭക്ഷണം മാത്രമേ കാണുന്നുള്ളൂ എന്നും ഇവിടെ നമ്മുടെ കണ്മുന്നില്‍ തന്നെ ഭക്ഷണം പാചകം ചെയ്യപ്പെടുകയാണ് എന്നും മമ്മൂട്ടി പറയുന്നുണ്ട്.

പിന്നീട് തന്റെ ഉച്ചഭക്ഷണം ആന്റണി ബോര്‍ദൈനുമായി പങ്കു വച്ചു. മാങ്ങയിട്ടു വച്ച കണമ്പ് കറിയും പുട്ടും ചോറും സ്വന്തം കൈകൊണ്ടു തന്നെ വിളമ്പിക്കൊടുത്തു. ഭക്ഷം ആസ്വദിച്ചു കഴിച്ച ആന്റണി ബോര്‍ദൈന്‍ മമ്മൂട്ടി തിരക്കിനിടയിലും തനിക്കായി സമയം ഒതുക്കി വച്ചതിനു നന്ദി പറഞ്ഞു. ഒടുവില്‍ അദ്ദേഹം മമ്മൂട്ടിയെ വിശേഷിപ്പിച്ചത്‌ ഇങ്ങനെയായിരുന്നു, “An island of calm at the center of a perpetual storm” (നിരന്തരമായ ഇടിമുഴക്കങ്ങള്‍ക്ക് നടുവിലെ ശാന്തതയുടെ ദ്വീപ്‌) എന്നാണ്.

മെഗാസ്റ്റാറിന്റെ ഭക്ഷണരീതി കണ്ട ബോർദൈന്റെ കമന്റ് ഇങ്ങനെ;“ഭക്ഷണത്തില്‍ താത്പര്യമുള്ള ആളല്ല എന്ന് തോന്നുന്നല്ലോ?”

മരണവാർത്തയെത്തിയതിനു പിന്നാലെ സോഷ്യൽ മീഡിയയിൽ മമ്മൂട്ടി പങ്കെടുത്ത ആന്റണി ബോര്‍ദൈനിന്റെ ഷോയുടെ വീഡിയോ ക്ലിപ്പിംഗ് സജീവമായി ഷെയര്‍ ചെയ്യുന്നുണ്ട്. ‘പോക്കിരിരാജ’യുടെ ആക്ഷന്‍ ചിത്രീകരണത്തിനിടയില്‍ എത്തുന്ന ആന്റണി ബോര്‍ദൈന്‍ ഇന്ത്യന്‍ സിനിമയെക്കുറിച്ചും മലയാള സിനിമയെക്കുറിച്ചും വിവരിച്ചു കൊണ്ടാണ് എപിസോഡ് ആരംഭിക്കുന്നത്. മമ്മൂട്ടിയോടുള്ള അദ്ദേഹത്തിന്റെ ആദരവും ആരാധനയും വീഡിയോയില്‍ ഉടനീള കാണാം.