തമിഴിലെ സൂപ്പർ സ്റ്റാർ ചിയാൻ വിക്രം നായകനാകുന്ന പുതിയ ചിത്രമാണ് സാമി ടു. ചിത്രത്തിന്റെ ടീസർ അടുത്തിടെ പുറത്തിറങ്ങിയിരുന്നു. ടീസർ എത്തിയതോടെ വിമർശനവുമായി നടി കസ്തൂരി രംഗത്തെത്തി. തന്റെ പുതിയ ചിത്രം തമിഴ് പടം ടുവിന്റെ ടീസറുമായി ഈ ടീസറിന് ബന്ധമുണ്ടെന്നും. സാമി ടുവിന്റെ ടീസറിൽ പുതിയതായി ഒന്നുമില്ലെന്നും തന്റെ ചിത്രത്തിന്റെ ടീസർ അതേപോലെ പകർത്തിയിരിക്കുകയാണെന്നും കസ്തൂരി ട്വിറ്ററിൽ കുറിച്ചു.
എന്നാൽ കസ്തൂരിയുടെ കുറിപ്പ് കണ്ട വിക്രം ആരാധകർക്ക് വെറുതെയിരുന്നില്ല. കിളവിയായിട്ടും ഐറ്റം ഡാൻസ് കളിച്ചുനടക്കാൻ നിങ്ങൾക്ക് നാണമില്ലേയെന്ന് ചിലർ കസ്തൂരിയെ ട്രോളി. പുതിയ ചിത്രത്തിൽ കസ്തൂരി ഒരു ഐറ്റം ഡാന്‍സ് അവതരിപ്പിക്കുന്നുണ്ട്. ഇതിനെയാണ് ആരാധകര്‍ ചോദ്യം ചെയ്തത്.
എന്നാൽ ട്രോളിയവർക്ക് മറുപടിയുമായി വീണ്ടും കസ്തൂരി രംഗത്തെത്തി. മകളുടെ പ്രായം വരുന്ന നടിമാര്‍ക്കൊപ്പം അഭിനയിക്കാന്‍ വിക്രത്തിന് കഴിയുമെങ്കിൽ ഈ പ്രായത്തില്‍ എനിക്ക് എന്തുകൊണ്ട് ഐറ്റം ഡാന്‍സ് ചെയ്തുകൂടാ എന്നായിരുന്നു കസ്തൂരിയുടെ ചോദ്യം. ഈ വിഷയം തമിഴകത്ത് ഏറെ ചർച്ച ചെയ്യപ്പെട്ടിരുന്നെങ്കിലും വിക്രം ഇതിനോടൊന്നും പ്രതികരിച്ചില്ല.
Post Your Comments