ഐപിഎല്‍ വാതുവയ്പ്പില്‍ യുവനടനെ പോലീസ് ചോദ്യം ചെയ്യുന്നു. നടനും നിര്‍മ്മാതാവുമായ അര്‍ബ്ബാസ് ഖാനെയാണ് മഹാരാഷ്ട്രാ പോലീസ് വിളിച്ചുവരുത്തി ചോദ്യം ചെയ്യുന്നത്. നടന്‍ സല്‍മാന്‍ ഖാന്റെ സഹോദരനാണ് അര്‍ബ്ബാസ് ഖാന്‍.
മുംബൈയില്‍ ഇന്നലെ പിടിയിലായ രണ്ട് വാതുവെപ്പുകാര്‍ നല്‍കിയ വിവരത്തിന്റെ അടിസ്ഥാനത്തിലാണ് പോലീസ് ചോദ്യം ചെയ്യല്‍. ഗൾഫ് കേന്ദ്രമാക്കി ചൂതാട്ട ശൃംഖല നടത്തുന്ന സോനു ജലൻ എന്നയാളെ ചോദ്യം ചെയ്തപ്പോഴാണ് അർബാസിന്റെ വിവരങ്ങള്‍ പുറത്തു വന്നത്.
സോനുവുമായി ചേർന്ന് ഇക്കഴിഞ്ഞ ഐ.പി.എൽ സീസണിൽ അർബാസ് വാതുവയ്പ്പ് നടത്തിയെന്നാണ് പൊലീസിന് ലഭിച്ച വിവരം. ഇതുമായി ബന്ധപ്പെട്ട് സോനു ജലൻ നടനിൽ നിന്ന് പണം തട്ടിയെടുത്തതായും പരാതിയുണ്ട്. മുംബൈ ഇന്ത്യന്‍സും പഞ്ചാബും തമ്മിലുള്ള മത്സരത്തിലാണ് വാതുവെപ്പ് നടന്നത്. അര്‍ബ്ബാസിനെ കൂടാതെ മറ്റു ചില ഉന്നതരുടെ പേരുകള്‍ സോനു വെളിപ്പെടുത്തിയതായും ഉടന്‍ നടപടികള്‍ ഉണ്ടാകുമെന്നും കേസന്വേഷിക്കുന്ന ഒരു ഉദ്യോഗസ്ഥന്‍ അറിയിച്ചു.
ഐ.പി.എൽ വാതുവയ്പ്പുമായി ബന്ധപ്പെട്ട് മുന്‍പും സോനു പോലീസ് പിടിയിലായിട്ടുണ്ട്. അന്ന് അധോലോക നേതാവ് ദാവൂദ് ഇബ്രാഹിമുമായും ഇയാള്‍ക്ക് ബന്ധമുണ്ടെന്നു ആരോപണം ഉയര്‍ന്നിരുന്നു.
Post Your Comments