മലയാള സിനിമയിലെ താര സംഘടനയായ അമ്മ സംഘടിപ്പിച്ച അമ്മ മഴവില്ല് എന്ന ഷോ സമൂഹ മാധ്യമങ്ങളില്‍ വലിയ ചര്‍ച്ചയാകുകയാണ്. ഷോയിലെ താരങ്ങളുടെ പ്രകടന വീഡിയോയും ചിത്രങ്ങളുമെല്ലാം സോഷ്യല്‍ മീഡിയയിലൂടെ പ്രചരിച്ചിരുന്നു. എന്നാല്‍ ഇപ്പോള്‍ സമൂഹ മാധ്യമങ്ങളിലെ ചര്‍ച്ച ഷോയിലെ ചില താരങ്ങളുടെ അസാന്നിധ്യമാണ്.
സൂപ്പര്‍ താരങ്ങള്‍ പോലും തിരക്കുകള്‍ മാറ്റി വച്ചുകൊണ്ട് റിഹെഴ്സല്‍ പരിപാടികളില്‍ പോലും സജീവമായിരുന്നതിന്റെ വീഡിയോകളും മറ്റും പുറത്തു വന്നതിനു പിന്നാലെ സമൂഹ മാധ്യമങ്ങളില്‍ ഉയരുന്ന ചോദ്യം എന്തുകൊണ്ടാണ് മലയാള സിനിമയിലെ യുവതാരങ്ങള്‍ ഈ ഷോ ബഹിഷ്കരിച്ചതെന്നാണ്.
മമ്മൂട്ടി, മോഹന്‍ലാല്‍, ദുല്‍ഖര്‍ സല്‍മാന്‍, ടൊവിനോ തോമസ്, ആസിഫ് അലി, മുകേഷ്, ജയറാം, കാളിദാസന്‍ തുടങ്ങിയ താരങ്ങള്‍ കിടിലന്‍ പ്രകടനവുമായി പ്രേക്ഷകരെ വിസ്മയിപ്പിക്കാനെത്തിയിരുന്നു. ഇതിനൊപ്പം പരിപാടില്‍ തെന്നിന്ത്യയുടെ സ്വന്തം താരമായ സൂര്യയും പങ്കുചേര്‍ന്നു.
എന്നാല്‍ മലയാളത്തിലെ യുവ നിരയിലെ ചില താരങ്ങളുടെ അസാന്നിധ്യം ചര്‍ച്ചയായി. അമ്മയുടെ നേതൃത്വത്തില്‍ എല്ലാ പരിപാടികളിലും മുന്‍പില്‍ ഉണ്ടാകുന്ന താരമാണ് ദിലീപ്. എന്നാല്‍ ദിലീപും ഭാര്യ കാവ്യ മാധവനും പരിപാടിക്കെത്തിയിരുന്നില്ല. അതിനൊപ്പം പൃഥ്വിരാജ്, ഇന്ദ്രജിത്ത്, കുഞ്ചാക്കോ ബോബന്‍, നിവിന്‍ പോളി, മഞ്ജു വാര്യര്‍, ഫഹദ് ഫാസില്‍, നസ്രിയ തുടങ്ങിയ താരങ്ങളും പരിപാടിയില്‍ നിന്നും വിട്ടു നിന്നു.
പൃഥ്വിരാജ് പ്രൊഡക്ഷന്‍സും സോണി പിക്‌ചേഴ്‌സും ചേര്‍ന്ന് നിര്‍മ്മിക്കുന്ന ആദ്യ ചിത്രമായ നയനുമായി ബന്ധപ്പെട്ട തിരക്കുകളിലാണ് പൃഥ്വിരാജ്. അമ്മമഴവില്ല് നടക്കുന്ന സമയത്ത് നസ്രിയയ്‌ക്കൊപ്പം ഫഹദ് തിരുവനന്തപുരത്തു ണ്ടായിരുന്നുവെന്നാണ് റിപ്പോര്‍ട്ടുകള്‍. എന്നാല്‍ താരവും ഷോയില്‍ പങ്കെടുത്തിരുന്നില്ല. റോമില്‍ ആയതിനാല്‍ കുഞ്ചാക്കോ ബോബനും ഷോയ്ക്ക് എത്തിയിരുന്നില്ല. ഗീതു മോഹന്‍ദാസ് സംവിധാനം ചെയ്യുന്ന മൂത്തോനുമായി ബന്ധപ്പെട്ട് നിവിന്‍ പോളി ശ്രീലങ്കയിലാണ്. ഓസ്ട്രേലിയയില്‍ ആയതിനാല്‍ മഞ്ജുവും ഇത്തവണ അമ്മ മഴവില്ല് ഷോയില്‍ പങ്കെടുത്തിരുന്നില്ല.
‘അമ്മ മഴവില്ല്’ എന്തിനോ വേണ്ടി തിരക്കിട്ട് തട്ടിക്കൂട്ടിയ പറ്റിക്കല്‍ പരിപാടിയോ?
Post Your Comments