റാബത്•പ്രശസ്ത മൊറോക്കന്‍ അവതാരകയും നടിയും ഗായികയുമായ വിയാം ദഹ്മാനി (34) ഹൃദയാഘാതം മൂലം അന്തരിച്ചു. ഞായറാഴ്ച രാത്രിയാണ്‌ സംഭവം. നിരവധി വര്‍ഷങ്ങളായി ദുബായില്‍ താമസിച്ചുവരികയായിരുന്നു ഇവര്‍.
അതേസമയം, കലാകാരിയുടെ മരണം ദുബായില്‍ വച്ചല്ല സംഭവിച്ചതെന്ന് ദുബായ് മീഡിയ ഓഫീസ് അറിയിച്ചു. വാര്‍ത്തകള്‍ പ്രസിദ്ധീകരിക്കുന്നതിനോ, ഓണ്‍ലൈനില്‍ പോസ്റ്റ്‌ ചെയ്യുന്നതിനോ മുന്‍പ് വിവരങ്ങള്‍ പരിശോധിച്ച് ഉറപ്പുവരുത്തണമെന്നും ദുബായ് മീഡിയ ഓഫീസ് മാധ്യമപ്രവര്‍ത്തകരോടും സോഷ്യല്‍ മീഡിയ ഉപയോക്താക്കളോടും അഭ്യര്‍ത്ഥിച്ചു.
ദഹ്മാനിയുടെ പെട്ടെന്നുള്ള മരണം ആരാധകരെ ഞെട്ടിച്ചു. ഇവര്‍ക്ക് പ്രാര്‍ത്ഥനകളും ആദരാഞ്ജലികളും അര്‍പ്പിച്ച് പോസ്റ്റുകള്‍ സോഷ്യല്‍ മീഡിയയില്‍ പ്രവഹിക്കുകയാണ്.
1983 ആഗസ്റ്റ്‌ 22 ന് മൊറോക്കോയിലെ കെനിത്രയില്‍ ജനിച്ച ദഹ്മാനി നിരവധി ഗാനങ്ങള്‍ ആലപിച്ചിട്ടുണ്ട്. ഹിന്ദി സിനിമകള്‍ അറബിക് സബ്‌ടൈറ്റിലില്‍ സംപ്രേക്ഷണം ചെയ്യുന്ന ദുബായ് ആസ്ഥാനമായ ഇന്ത്യന്‍ ചാനലായ സീ-അഫ്ലമില്‍ അവതാരകയായും ഇവര്‍ പ്രവര്‍ത്തിച്ചിട്ടുണ്ട്.
2011 ല്‍ അഭിനയ ജീവിതത്തിന് തുടക്കം കുറിച്ച ദഹ്മാനി ഏതാനും പാകിസ്ഥാനി ചലച്ചിത്രങ്ങളിലും അഭിനയിച്ചിട്ടുണ്ട്. റമദാനായി ഒരു ഷോ ചിത്രീകരിക്കുന്നതിനുള്ള തയ്യാറെടുപ്പുകള്‍ നടത്തി വരവേയാണ് ആകസ്മികമായി മരണം തേടിയെത്തിയത്.
Post Your Comments