ഹാപ്പി ഹവേഴ്സിന്റെ ബാനറില്‍ ഷൈജു ഖാലിദും, സമീര്‍ താഹിറും ചേര്‍ന്ന് നിര്‍മ്മിച്ച സുഡാനി ഫ്രം നൈജീരിയയില്‍ താന്‍ പ്രതിഫലം ചോദിച്ചിട്ടില്ലെന്നു സൗബിന് ഷാഹിര്‍ .ചിത്രത്തിലെ മജീദ്‌ എന്ന കേന്ദ്ര കഥാപാത്രത്തെ അവതരിപ്പിച്ചത് സൗബിനാണ്.
പ്രതിഫല തര്‍ക്കത്തിന്റെ കാര്യത്തില്‍ വിവാദങ്ങളിലേക്ക് നീങ്ങുന്ന സുഡാനി എന്ന ചിത്രത്തിനെതിരെ നൈജീരിയന്‍ താരം സാമുവല്‍ ഉന്നയിച്ച ആരോപണം കഴിഞ്ഞ ദിവസം സോഷ്യല്‍ മീഡിയയില്‍ ചര്‍ച്ചയായിരുന്നു. കറുത്ത വര്‍ഗ്ഗക്കാരനയതിന്റെ പേരില്‍ അവഗണിക്കപ്പെട്ടുവെന്നും മറ്റുള്ളവര്‍ക്ക് നല്‍കിയതില്‍ നിന്ന് വളരെ കുറച്ചു പ്രതിഫലമാണ് തനിക്ക് നല്‍കിയതെന്നും സാമുവല്‍ വ്യക്തമാക്കിയിരുന്നു. ചിത്രത്തിന്‍റെ വിജയത്തിന് ശേഷം കൂടുതല്‍ പ്രതിഫലം നല്‍കാമെന്ന അണിയറ പ്രവര്‍ത്തകരുടെ വാക്ക് പാലിക്കപ്പെട്ടില്ലെന്നും സാമുവല്‍ കുറ്റപ്പെടുത്തി.
ഈ വിവാദവുമായി ബന്ധപ്പെട്ട് നടന്‍ സൗബിന് ഷാഹിര്‍ പ്രതികരിച്ചത് ഇങ്ങനെ
“സുഡാനിയില്‍ അഭിനയിക്കുന്നതിനായി ഞാന്‍ പ്രതിഫലം ചോദിച്ചില്ല. നല്ലൊരു സിനിമ ആയിരിക്കണം എന്ന ആഗ്രഹമുണ്ടായിരുന്നു. വലിയൊരു പ്രതിഫലം എനിക്ക് നല്‍കിയിട്ടില്ല ഞാന്‍ ചോദിച്ചതുമില്ല. സാമുവലിന്റെ കാര്യത്തില്‍ ചിത്രത്തിന്‍റെ ഗംഭീര അഭിപ്രായമായിരിക്കാം പ്രതിഫലത്തെക്കുറിച്ച് അദ്ദേഹത്തെ ചിന്തിപ്പിക്കുന്നത്. അത്ര വലിയ ഹിറ്റിലേക്കാണ് ചിത്രം നീങ്ങുന്നത്.” പ്രതിഫലവുമായി ബന്ധപ്പെട്ടു ഒരു കബളിപ്പിക്കല്‍ നടന്നതായി തോന്നുന്നില്ലെന്നും സൗബിന് മനോരമയുടെ ‘നേരെ ചൊവ്വേ’ അഭിമുഖ പരിപാടിയില്‍ സംസാരിക്കവേ വ്യക്തമാക്കി.
Post Your Comments