ബോളിവുഡ് സിനിമ പ്രേമികളില്‍ സല്‍മാന്‍ ഖാനെ അറിയാത്തവരായി ആരും ഉണ്ടാകില്ല. സിനിമകളുടെയും വിവാദങ്ങളുടെയും പേരില്‍ നിരന്തരം വാര്‍ത്തകളില്‍ ഇടം പിടിക്കുന്ന നടന് ലോകമെമ്പാടും ആരാധകരുണ്ട്.
സല്‍മാന്‍റെ പുതിയ ചിത്രമായ റേസ് 3യ്ക്ക് ആശംസകള്‍ നേര്‍ന്ന് അടുത്തിടെ ഹോളിവുഡ് സൂപ്പര്‍സ്റ്റാര്‍ സില്‍വസ്റ്റര്‍ സ്റ്റാലന്‍ ഇന്‍സ്റ്റാഗ്രാമില്‍ പോസ്റ്റ് ചെയ്തിരുന്നു. പക്ഷെ മസില്‍മാന് പകരം ബോബി ഡിയോളിന്‍റെ പടമാണ് അദ്ദേഹം തെറ്റായി പോസ്റ്റ് ചെയ്തത്. അത് സല്‍മാന്‍ ആരാധകര്‍ക്കിടയില്‍ ഏറെ പ്രതിഷേധമുയര്‍ത്തിയിരുന്നു.
പിന്നീട് ബോബി ഡിയോളിനെ മാറ്റി സ്റ്റാലന്‍ യഥാര്‍ത്ഥ സല്‍മാന്‍ ഖാന്‍റെ ചിത്രം തന്നെ പോസ്റ്റ് ചെയ്തു. ഒന്നു കൂടി ശ്രമിക്കാം, തന്‍റെ പുതിയ സിനിമയുമായി വരുന്ന പ്രതിഭാധനനായ സല്‍മാന്‍ ഖാന് എല്ലാവിധ ആശംസകളും എന്നാണ് അദ്ദേഹം ഫോട്ടോയ്ക്ക് താഴെ കുറിച്ചത്. ഇത്തവണയും പരാജയപ്പെടുകയാണെങ്കില്‍ ശ്രമം ഉപേക്ഷിക്കുകയാണെന്ന് സ്റ്റാലന്‍ തമാശരൂപേണ പറഞ്ഞെങ്കിലും അദ്ദേഹം തങ്ങളുടെ ഇഷ്ട നടനെ തിരിച്ചറിഞ്ഞ സന്തോഷത്തിലാണ് സല്‍മാന്‍ ആരാധകര്‍.
Post Your Comments