അങ്കമാലി ഡയറീസിന് ശേഷം ആന്‍റണി വര്‍ഗീസ്‌ നായകനാകുന്ന “സ്വാതന്ത്ര്യം അര്‍ദ്ധരാത്രിയില്‍” എന്ന സിനിമയ്ക്ക് വേണ്ടി പ്രേക്ഷകര്‍ ആകാംക്ഷയോടെയാണ് കാത്തിരിക്കുന്നത്. ചിത്രത്തിന്റെ പോസ്റ്ററും ട്രെയിലറും നേരത്തെ ഇന്‍റര്‍നെറ്റില്‍ തരംഗമായിരുന്നു. ഇപ്പോള്‍ ആ ട്രെയിലറിനെ പ്രശംസിച്ച് ബോളിവുഡ് താരങ്ങള്‍ രംഗത്ത് വന്നിരിക്കുകയാണ്.
ജാക്കി ഷറോഫ്, സുനില്‍ ഷെട്ടി എന്നിവരാണ് സിനിമയുടെ ട്രെയിലര്‍ ഇഷ്ടപ്പെട്ടതായി കാണിച്ച് ട്വിറ്ററിലൂടെ പങ്കു വച്ചത്.
സിനിമ ആസ്വദിക്കുന്നതിന് ഭാഷ തടസമല്ലെന്നും ഈ ട്രെയിലര്‍ ഇഷ്ടമായെന്നുമാണ് സുനില്‍ ഷെട്ടി ട്വീറ്റ് ചെയ്തത്. ആന്‍റണിക്ക് എല്ലാവിധ ആശംസയും നേര്‍ന്ന അദ്ദേഹം ചിത്രത്തിന്റെ റിലീസിന് വേണ്ടി ആകാംക്ഷയോടെ കാത്തിരിക്കുകയാണെന്നും പറഞ്ഞു. ഗംഭീരം എന്ന് ട്രെയിലറിനെ വിശേഷിപ്പിച്ച ജാക്കി ഷറോഫും ആന്‍റണി വര്‍ഗീസിന് ആശംസകള്‍ നേര്‍ന്നു.
ടിനു പാപ്പച്ചന്‍ സംവിധാനം ചെയ്തിരിക്കുന്ന സ്വാതന്ത്ര്യം അര്‍ദ്ധരാത്രിയില്‍ ഒരു ത്രില്ലര്‍ ചിത്രമായാണ് ഒരുക്കിയിരിക്കുന്നത്. ആന്‍റണി വര്‍ഗീസ്‌, വിനായകന്‍, ചെമ്പന്‍ വിനോദ് എന്നിവര്‍ പ്രധാന വേഷങ്ങളിലെത്തുന്ന സിനിമ മാര്‍ച്ച് അവസാനം തിയറ്ററുകളില്‍ എത്തും.
Post Your Comments