കോട്ടയം കുഞ്ഞച്ചന്‍ വീണ്ടും വരുന്നു

മമ്മൂട്ടിയുടെ ജനപ്രിയ കഥാപാത്രങ്ങളില്‍ ഒന്നായ കോട്ടയം കുഞ്ഞച്ചന്‍ വീണ്ടും വരുകയാണ്. ടി എസ് സുരേഷ്ബാബു സംവിധാനം ചെയ്ത് 1990ല്‍ പുറത്തിറങ്ങിയ കോട്ടയം കുഞ്ഞച്ചന്‍ അക്കാലത്തെ ഏറ്റവും വലിയ ഹിറ്റായിരുന്നു. മുട്ടത്തു വര്‍ക്കിയുടെ കഥയ്ക്ക് തിരക്കഥ എഴുതിയത് ഡെന്നിസ് ജോസഫാണ്. ആ സിനിമയും മമ്മൂട്ടിയുടെ അച്ചായന്‍ വേഷവും ആരാധകര്‍ ആവേശത്തോടെയാണ് സ്വീകരിച്ചത്.

ആട് 2 ന്‍റെ നൂറാം ദിനാഘോഷ ചടങ്ങില്‍ വച്ച് മമ്മൂട്ടിയാണ് തന്‍റെ കഥാപാത്രത്തിന്‍റെ രണ്ടാം വരവ് പ്രഖ്യാപിച്ചത്. ആട് സംവിധാനം ചെയ്ത മിഥുന്‍ മാനുവല്‍ തോമസാണ് കോട്ടയം കുഞ്ഞച്ചന്‍ 2 ഒരുക്കുക. ഫ്രൈഡേ ഫിലിംസിന്‍റെ വിജയ്‌ ബാബുവാണ് നിര്‍മാതാവ്.

പുതിയ സിനിമയുടെ കാര്യം മമ്മൂട്ടി ഫെസ്ബുക്കിലൂടെ സ്ഥിരീകരിച്ചു.
തന്‍റെ കരിയറിലെ ആദ്യ സൂപ്പര്‍താര ചിത്രത്തെക്കുറിച്ച് മിഥുന്‍ മാനുവല്‍ തോമസ്‌ പറയുന്നത് ഇങ്ങനെയാണ്,

പ്രിയരേ,
കാലമെന്ന മഹാപ്രവാഹത്തിന് പരകോടി നന്ദി..!!! ഇതിഹാസം മുട്ടത്തു വർക്കിയിലൂടെ ഉരുത്തിരിഞ്ഞ്, അനുഗ്രഹീത ചലച്ചിത്രകാരൻ ഡെന്നിസ് ജോസഫ് ഊടും പാവും നെയ്തു, നടനവിസ്മയം മമ്മൂട്ടിയിലൂടെ, സുരേഷ് ബാബു എന്ന പ്രഗത്ഭ സംവിധായകനിലൂടെ, മണി എന്ന പ്രശസ്ത നിർമ്മാതാവിലൂടെ കാൽനൂറ്റാണ്ടിനും മുൻപ് കേരളക്കര ഒന്നാകെയുള്ള സിനിമാകൊട്ടകകളിൽ ആരവങ്ങൾ തീർത്ത പ്രതിഭാസം, കോട്ടയം കുഞ്ഞച്ചനെ, തുടക്കക്കാരനായ എന്നിലേയ്ക്ക് എത്തിച്ചതിന്..!! ഇതുവരെയുള്ള യാത്രയിൽ ആശ്വാസമായ തണൽ മരങ്ങൾക്കു നന്ദി, വെളിച്ചം വിതറിയ വിളക്കുകാലുകൾക്ക് നന്ദി, സിനിമയെ സ്വപ്നം കണ്ടു നടന്നവനെ തീരത്തടുപ്പിച്ച പായ്‌വഞ്ചികൾക്ക് നന്ദി.. കൈവിടാതെ കൂടെ നിൽക്കുന്ന പ്രേക്ഷക ലക്ഷങ്ങൾക്ക് നന്ദി..:) ഫ്രൈഡേ ഫിലിം ഹൌസിനോടൊപ്പം ചേർന്ന് സവിനയം, സസന്തോഷം, സസ്നേഹം അവതരിപ്പിക്കുന്നു.. കോട്ടയം കുഞ്ഞച്ചൻ 2..