മലയാള ചലച്ചിത്ര ലോകത്ത് കൊടുങ്കാറ്റുയര്‍ത്തിയ സിനിമയായിരുന്നു അവളുടെ രാവുകള്‍. ഒരു അഭിസാരികയുടെ ജീവിത കഥ പറഞ്ഞ സിനിമ അന്നുവരെ നിലവിലുണ്ടായിരുന്ന പരമ്പരാഗത ചലച്ചിത്ര സങ്കല്‍പ്പങ്ങളെ പൊളിച്ചടുക്കി. ആ ചിത്രത്തിന് ഇപ്പോള്‍ നാല്‍പത് വയസ്.
ഐവി ശശി സംവിധാനം ചെയ്ത അവളുടെ രാവുകളില്‍ സീമയാണ് നായികയായ രാജിയെ അവതരിപ്പിച്ചത്. അക്കാലത്ത് കൊറിയോഗ്രാഫര്‍ ചോപ്ര മാസ്റ്ററുടെ അസിസ്റ്റന്‍റായിരുന്ന അവരുടെ ആദ്യ ചിത്രമായിരുന്നു അത്. സിനിമയുമായി ബന്ധപ്പെട്ടുണ്ടായ രസകരമായ അനുഭവങ്ങള്‍ സീമ അടുത്ത കാലത്ത് ചില മാധ്യമങ്ങളോട് പങ്കു വച്ചിരുന്നു.
അവളുടെ രാവുകളില്‍ നായികയാകാന്‍ പറയുന്ന കാശ് തരാമോ എന്ന് സീമ സംവിധായകന്‍ ഐവി ശശിയോട് ചോദിച്ചിരുന്നു. തരാമെന്ന് അദ്ദേഹം സമ്മതിക്കുകയും ചെയ്തു. വെറും 18 ദിവസം കൊണ്ട് ഷൂട്ടിംഗ് പൂര്‍ത്തിയായി. സുകുമാരന്‍, എംജി സോമന്‍, രവികുമാര്‍ എന്നിവരാണ് സിനിമയിലെ മറ്റ് കഥാപാത്രങ്ങളെ അവതരിപ്പിച്ചത്. മൂവായിരം രൂപയാണ് സീമയ്ക്ക് പ്രതിഫലമായി കിട്ടിയത്.
മലയാളത്തില്‍ ആദ്യമായി ഒരു സിനിമക്ക് എ സര്‍ട്ടിഫിക്കറ്റ് കിട്ടുന്നത് അവളുടെ രാവുകള്‍ക്കാണ്. ആ ചിത്രത്തിലൂടെ ശക്തമായ സിനിമാ പരിക്ഷണമാണ് സംവിധായകന്‍ നടത്തിയതെന്ന് നിസ്സംശയം പറയാന്‍ സാധിക്കും. 1978 മാര്‍ച്ച് മൂന്നിനാണ് അവളുടെ രാവുകള്‍ റിലീസ് ചെയ്തത്. മലയാളത്തിനു പുറമേ തമിഴിലും ഹിന്ദിയിലും സിനിമ വലിയ വിജയമായി.
Post Your Comments