ഏറെ കാത്തിരിപ്പിനൊടുവില്‍ രജനികാന്തിന്‍റെ പുതിയ ചിത്രമായ കാലയുടെ ടീസര്‍ പുറത്തു വന്നു. കറുപ്പും വെളുപ്പും തമ്മിലുള്ള പോരാട്ടത്തിന്‍റെ കഥ പറയുന്ന സിനിമ സംവിധാനം ചെയ്യുന്നത് പാ രഞ്ജിത്താണ്. മാര്‍ച്ച് ഒന്നിന് നിശ്ചയിച്ചിരുന്ന ടീസര്‍ ലോഞ്ച് കാഞ്ചി ശങ്കരാചാര്യര്‍ സ്വാമി ജയേന്ദ്ര സരസ്വതിയുടെ നിര്യാണം മൂലമാണ് ഒരു ദിവസം നീട്ടിയത്. പുറത്തു വന്ന് പന്ത്രണ്ടു മണിക്കൂറിനുള്ളില്‍ 46 ലക്ഷം പേരാണ് ടീസര്‍ കണ്ടത്.
രജനികാന്ത് നായകനാകുന്ന കാലായില്‍ ബോളിവുഡ് താരം നാന പടേക്കറാണ് വില്ലനായി എത്തുന്നത്. വെളുപ്പിനെ നന്മയുടേയും കറുപ്പിനെ തിന്മയുടെയും പ്രതിരൂപമായാണ്‌ നാം സാധാരണ കാണുന്നത്. എന്നാല്‍ ഇവിടെ സംവിധായകന്‍ വ്യത്യസ്ഥമായ ഒരു പരീക്ഷണത്തിനാണ് മുതിര്‍ന്നിരിക്കുന്നത്. കറുത്ത ഷര്‍ട്ടും മുണ്ടും ധരിച്ച് പ്രത്യക്ഷപ്പെടുന്ന രജനി കാലന്‍റെ രൂപമായി സ്വയം വിശേഷിപ്പിക്കുമ്പോള്‍ രാഷ്ട്രീയ നേതാവായി അഭിനയിക്കുന്ന നാന പടേക്കര്‍ തൂവെള്ള വേഷത്തിലാണ് വരുന്നത്. രാഷ്ട്രീയ സംവിധാനവും ഭരണവും ശുദ്ധീകരിക്കുന്നതിനെ കുറിച്ച് അയാള്‍ വാചാലനാകുന്നു.
ഹുമ ഖുറേഷി, അഞ്ജലി പാട്ടില്‍, സമുദ്രക്കനി എന്നിവരും അഭിനയിക്കുന്ന സിനിമയുടെ സംഗീത സംവിധാനം ചെയ്തിരിക്കുന്നത് സന്തോഷ്‌ നാരായണനാണ്. വണ്ടര്‍ബാര്‍ ഫിലിംസിന്‍റെ ബാനറില്‍ ധനുഷ് നിര്‍മിക്കുന്ന കാല ഏപ്രില്‍ 27ന് പ്രദര്‍ശനത്തിനെത്തും.
Post Your Comments