മമ്മൂട്ടി നായകനാകുന്ന ഏറ്റവും പുതിയ ചിത്രമാണ് പരോള്‍. നവാഗതനായ ശരത് സന്ദിത് സംവിധാനം ചെയ്യുന്ന സിനിമയില്‍ ഒരു ജയില്‍ പുള്ളിയുടെ വേഷമാണ് അദ്ദേഹം അവതരിപ്പിക്കുന്നത്. സഖാവ്‌ അലക്സ് എന്നാണ് കഥാപാത്രത്തിന്‍റെ പേര്. ഒരു കമ്മ്യുണിസ്റ്റുകാരന്‍റെ ജീവിതയാത്രകളിലൂടെ സഞ്ചരിക്കുന്ന പരോള്‍ മാര്‍ച്ച് 30ന് റിലീസ് ചെയ്യും.
മമ്മൂട്ടിയുടെ സുവര്‍ണ്ണ കാലം അനുസ്മരിപ്പിക്കുന്ന ഒരു പിടി നല്ല അഭിനയ മുഹൂര്‍ത്തങ്ങളാണ് സിനിമയുടെ ഹൈലൈറ്റെന്ന് അണിയറ പ്രവര്‍ത്തകര്‍ പറയുന്നു. ഫാമിലി ത്രില്ലര്‍ ഗണത്തില്‍പെടുത്താവുന്ന പരോളിന്‍റെ വലിയ ശതമാനവും ചിത്രീകരിച്ചിരിക്കുന്നത് ബാംഗ്ലൂര്‍ ജയിലിലില്‍ വച്ചാണ്. മമ്മൂട്ടി തടവുപുള്ളിയുടെ വേഷം ചെയ്ത ബാലു മഹേന്ദ്രയുടെ യാത്ര എന്ന പ്രശസ്ത സിനിമയിലും ഇതേ ജയില്‍ പ്രധാന കഥാപാത്രമായി വന്നിട്ടുണ്ട്. അതിനുശേഷം ആദ്യമായിട്ടാണ് അവിടെ ഒരു മലയാള സിനിമയുടെ ഷൂട്ടിംഗ് നടക്കുന്നത്. ഇനിയയും മിയയുമാണ് നായികമാര്‍. ഇനിയ മമ്മൂട്ടിയുടെ ഭാര്യയുടെ വേഷത്തിലെത്തുമ്പോള്‍ അദ്ദേഹത്തിന്‍റെ സഹോദരി വേഷമാണ് മിയക്ക്.
ബാഹുബലി സിനിമയില്‍ കാലകേയനെ അവതരിപ്പിച്ച പ്രഭാകറാണ് ബുള്ളറ്റ് രാഘവന്‍ എന്ന വില്ലനാകുന്നത്. സുരാജ് വെഞ്ഞാറമൂട്, സുധീര്‍ കരമന, അലന്‍സിയര്‍, അരിസ്റ്റോ സുരേഷ്, ജൂബി നൈനാന്‍ എന്നിവരാണ് മറ്റ് അഭിനേതാക്കള്‍. തിരക്കഥ അജിത്ത് പൂജപ്പുര. മുന്നറിയിപ്പിന് ശേഷം മമ്മൂട്ടി തടവു പുള്ളിയുടെ വേഷത്തിലെത്തുന്ന സിനിമ കൂടിയാണ് പരോള്‍.
Post Your Comments