കഴിഞ്ഞ കുറച്ചു ദിവസമായി മോഹന്‍ലാല്‍ ആരാധകര്‍ അന്വേഷിക്കുന്നത് ഒരു കുഞ്ഞു ശബ്ദത്തിന്റെ ഉടമയെയാണ്. കട്ട മോഹന്‍ലാല്‍ ആരാധികയായി മഞ്ജു വാര്യര്‍ എത്തുന്ന മോഹന്‍ലാല്‍ എന്ന ചിത്രത്തിന്റെ ടീസര്‍ കഴിഞ്ഞ ദിവസം പുറത്തിറങ്ങിയിരുന്നു. ടീസറിലെ ‘ലാലേട്ടാ’എന്ന ഗാനം സമൂഹമാധ്യമങ്ങളില്‍ ശ്രദ്ധിക്കപ്പെടുകയും ചെയ്തു.
ഈ ഗാനം ആലപിച്ചിരിക്കുന്നത് ആരെന്ന ആരാധകരുടെ ചോദ്യങ്ങള്‍ക്ക് മറുപടിയായി ചിത്രത്തിന്റെ തിരക്കഥാകൃത്തായ സുരേഷ് വരനാട് കഴിഞ്ഞ ദിവസം ഫെയ്സ്ബുക്കിലൂടെ ആ ശബ്ദത്തിനുടമയാരാണെന്ന് പങ്കുവച്ചിരുന്നു. സാജിദ് യഹിയ ഒരുക്കുന്ന ഈ ചിത്രത്തിലെ ആ ഗാനം ആലപിച്ചിരിക്കുന്നത് നടന്‍ ഇന്ദ്രജിത്തിന്റേയും പൂര്‍ണിമയുടെയും മകള്‍ പ്രാര്‍ത്ഥനയാണ്. മനു മഞ്ജിത്ത് എഴുതിയ വരികള്‍ക്ക് സംഗീതം നല്‍കിയിരിക്കുന്നത് ടോണി ജോസഫ് ആണ്.
സുരേഷ് വരനാടിന്റെ ഫെയ്സ്ബുക്ക് പോസ്റ്റ് :
മോഹന്‍ലാലിന്റെ ടീസര്‍ ജനങ്ങളിലേക്ക് എത്തിയ അന്ന് മുതല്‍ ഞാന്‍ കേള്‍ക്കുന്ന ഒരു ചോദ്യമാണ്, അതില്‍ കേള്‍ക്കുന്ന, ‘ലാലേട്ടാ ലാ ലാ’ എന്ന ഗാനം ആലപിച്ച ആ ഇമ്പമുള്ള ശബ്ദത്തിന്റെ ഉടമ ആരാണെന്ന്. ആ കക്ഷിയെയാണ് നിങ്ങള്‍ ദേ ഈ ഫോട്ടോയില്‍ കാണുന്നത്. ഞങ്ങളുടെ കഥയിലെ നായകന്‍ ഇന്ദ്രേട്ടന്റെ മകളായ പ്രാര്‍ത്ഥന ഇന്ദ്രജിത്.
Post Your Comments