മലയാളത്തിലെ എക്കാലത്തെയും ഹിറ്റ് ചിത്രമായ ക്ലാസ്മേറ്റ്സിലെ റസിയയായി പ്രേക്ഷക മനസില്‍ ഇടം നേടിയ നടി രാധിക വീണ്ടും അഭിനയലോകത്ത് സജീവമാകുന്നു. ലാല്‍ ജോസ് ഒരുക്കിയ ക്ലാസ്മേറ്റ്സ് വന്‍ വിജയമായിരുന്നു. നരേന്റെ നായികയായി ചിത്രത്തില്‍ എത്തിയ രാധിക വിവാഹശേഷം അഭിനയത്തില്‍ നിന്ന് വിട്ട് നില്‍ക്കുകയായിരുന്നു.
ഷാജി എന്‍. കരുണ്‍ സംവിധാനം ചെയ്യുന്ന ഓളില്‍ ശക്തമായ കഥാപാത്രത്തെ അവതരിപ്പിച്ചുകൊണ്ടാണ് രാധിക എത്തുന്നത്. ഷാജി എന്‍. കരുണിനെപ്പോലെ മഹാനായ സംവിധായകന്റെ ചിത്രത്തില്‍ അഭിനയിച്ച്‌ തിരിച്ചുവരാനായതില്‍ സന്തോഷമുണ്ടെന്ന് രാധിക പറയുന്നു. ജയറാം ചിത്രം സ്വപാനത്തിനു ശേഷം ഷാജി എന്‍. കരുണ്‍ സംവിധാനം ചെയ്യുന്ന ചിത്രമാണ് ഓള്‍.
ഒരു ചിത്രകാരന്റെ ജീവിതത്തിലെ ആത്മസംഘര്‍ഷങ്ങള്‍ പ്രമേയമയമാക്കുന്ന ഈ ചിത്രത്തില്‍ ബാലതാരമായി തിളങ്ങിയ എസ്തര്‍ ആദ്യമായി നായികയാവുന്നു. നായക കഥാപാത്രത്തെ അവതരിപ്പിക്കുന്നത് ഷെയ്ന്‍ നിഗമാണ്. സുഗന്ധി എന്ന ആണ്ടാള്‍ ദേവനായകി എന്ന നോവലിലൂടെ ഈ വര്‍ഷത്തെ വയലാര്‍ അവാര്‍ഡ് നേടിയ ടി.ഡി രാമകൃഷ്ണനാണ് തിരക്കഥ രചിച്ചിരിക്കുന്നത്. മനോജ് കുറൂര്‍ എഴുതിയ ഗാനങ്ങള്‍ക്ക് സംഗീതം ഒരുക്കുന്നത് ശ്രീവത്സന്‍ ജെ. മേനോനാണ്.
ഛായാഗ്രഹണം എം.ജെ. രാധാകൃഷ്ണനും എഡിറ്റിംഗ് ശ്രീകര്‍ പ്രസാദും നിര്‍വഹിക്കുന്നു. കുട്ടിസ്രാങ്കിലൂടെ ദേശീയ പുരസ്കാരം നേടിയ ഐസക് തോമസ് കൊട്ടുകാപള്ളിയാണ് പശ്ചാത്തല സംഗീതം ഒരുക്കുന്നത്.
Post Your Comments