ദേശീയ പുരസ്കാര ജേതാവ് നടന്‍ സലിം കുമാര്‍ ഇപ്പോള്‍ സംവിധായകനായി പേരെടുത്തിരിക്കുകയാണ്. സലിംകുമാര്‍ സംവിധാനം ചെയ്യുന്ന പുതിയ ചിത്രത്തില്‍ ജയറാം നായകനാകുന്നു. ചിത്രത്തിന്റെ ഷൂട്ടിംഗ് സെപ്തംബര്‍ 20ന് ആരംഭിക്കും. സലിം കുമാര്‍ സംവിധാനം ചെയ്യുന്ന രണ്ടാമത്തെ ചിത്രമാണിത്. ആദ്യചിത്രമായ കറുത്ത ജൂതന്‍ ഈ മാസമാണ് തിയേറ്ററുകളില്‍ എത്തിയത്. ചിത്രത്തില്‍ പ്രധാന വേഷത്തില്‍ അഭിനയിച്ചതും സലിം കുമാര്‍ തന്നെയായിരുന്നു. ഈ ചിത്രത്തിലൂടെ കഴിഞ്ഞ വര്‍ഷത്തെ മികച്ച കഥാകൃത്തിനുള്ള സംസ്ഥാന അവാര്‍ഡ് സലിം കുമാറിന് ലഭിക്കുകയുണ്ടായി.
മറ്റൊരു പ്രമുഖ നടനെ നായകനാക്കി സലിം കുമാര്‍ സംവിധാനം ചെയ്യുന്ന ആദ്യ ചിത്രമെന്ന പ്രത്യേകതയും ജയറാം ചിത്രത്തിനുണ്ട്. തമിഴ് താരം സമുദ്രക്കനി സംവിധാനം ചെയ്യുന്ന ആകാശമിഠായിയാണ് ജയറാമിന്റെ റിലീസ് ചെയ്യാനുള്ള മലയാള ചിത്രം. സമുദ്രക്കനി തന്നെ തമിഴില്‍ സംവിധാനം ചെയ്ത അപ്പ എന്ന ചിത്രത്തിന്റെ റീമേക്കാണിത്. വരലക്ഷ്മി ശരത്കുമാറാണ് നായിക. ഇനിയ, ഇര്‍ഷാദ്, നന്ദന എന്നിവരാണ് മറ്റ് താരങ്ങള്‍. വെങ്കട്ട് പ്രഭു സംവിധാനം ചെയ്യുന്ന തമിഴ് ചിത്രം പാര്‍ട്ടിയിലും ജയറാം പ്രധാന വേഷത്തിലെത്തുന്നുണ്ട്.
Post Your Comments