കട്ട്-ഔട്ടിൽ പാലഭിഷേകമില്ല; വ്യത്യസ്ത ആഘോഷവുമായി ആരാധകർ

തമിഴകത്തെ സൂപ്പര്‍ സ്റ്റാര്‍ അജിത്തിന്റെ വിവേഗം വന്‍ മുന്നേറ്റം നടത്തുകയാണ്. സിനിമയ്ക്കൊപ്പം തന്നെ ചര്‍ച്ചയാകുകയാണ് താരത്തിന്റെ പേരിലുള്ള ഇഡ്ഡലി. ഈ ഇഡ്ഡലി ഒരു മെനുകാർഡിലും കാണാൻ കഴിയില്ല. അജിത്തിന്റെ ആരാധകർ മുൻകൈ എടുത്താണ് ഈ ഇഡ്ഡലി ഒരുക്കിയിരിക്കുന്നത്. കുറച്ച് ദിവസങ്ങൾക്ക് മുൻപ് അജിത്തിന്റെ കട്ട്-ഔട്ടിൽ പാലഭിഷേകം നടത്തരുതെന്ന് പറഞ്ഞ് അജിത്ത് ഫാൻസ് ക്ലബ് രംഗത്ത് വന്നിരുന്നു. പാൽ പാഴാക്കുന്നതിന് പകരം വിശക്കുന്നവന്റെ വിശപ്പടക്കാം എന്ന ഉദ്ദേശത്തിലാണ് ഭീമൻ ഇഡ്ഡലി എന്നാശയവുമായി ഇവർ രംഗത്ത് വന്നിരിക്കുന്നത്.

അജിത്തിന്റെ പേരിലുള്ള ഭീമൻ ഇഡ്ഡലി കാണമെങ്കിൽ ചെന്നൈ റോയാപുരത്ത് ഭാരത് തിയേറ്ററിന് മുമ്പിൽ തന്നെ എത്തണം. 57 കിലോഗ്രാം ഭാരമാണ് ഈ ഭീമൻ ഇഡ്ഡലിക്കുള്ളത്. തലയുടെ 57ാമത്തെ ചിത്രം വിവേഗത്തിന്റെ റിലീസിനോടനുബന്ധിച്ചാണ് ഭീമൻ ഇഡ്ഡലിയെ അവതരിപ്പിച്ചിരിക്കുന്നത്. തമിഴ്നാട് സമയൽ കാലൈ തൊളിലാളർ മുന്നേട്ര സംഗം (Nadu Samaiyal Kalai Tholizhalar Munnetra Sangam)എന്ന സംഘടനയാണ് ഈ ഭീമൻ ഇഡ്ഡലിയുടെ രൂപകല്പനയ്ക്ക് പിന്നിൽ.