സ്വാഭാവിക അഭിനയത്തിലൂടെ ബോളിവുഡിലെ മുന്‍ നിര നായികമാരില്‍ ഒരാളായി മാറിയ നടിയാണ് കങ്കണാ റണാവത്ത്. പ്രേക്ഷക ശ്രദ്ധയും കൈയടിയും മാത്രമല്ല, മൂന്ന് ദേശീയ അവാര്‍ഡും താരം സ്വന്തമാക്കിയിട്ടുണ്ട്. എന്നാല്‍ ഇപ്പോള്‍ ചര്‍ച്ച കങ്കണാ നായികയാവുന്ന സിമ്രാന്‍ എന്ന ചിത്രമാണ്. ഇനി ഒരു ദേശീയ അവാര്‍ഡ് കൂടി അടിച്ചുമാറ്റുമോ കങ്കണ എന്നാണ് ഇപ്പോള്‍ എല്ലാവരുടെയും സംശയം.
സിമ്രാന്റെ ട്രെയിലര്‍ കാണുമ്പോള്‍ ഈ സംശയം അസ്ഥാനത്തല്ലെന്ന് വ്യക്തമാകും. അത്ര ഗംഭീരമാണ് ട്രെയിലറില്‍ കങ്കണയുടെ ലുക്കും മേക്കോവറും അഭിനയവും. യഥാര്‍ത്ഥ സംഭവത്തെ അടിസ്ഥാനമാക്കി ഹന്‍സാല്‍ മേത്ത ഒരുക്കിയ സിമ്രാനില്‍ നഴ്സില്‍ നിന്ന് തുടങ്ങി പിന്നീട് ബാങ്ക് മോഷ്ടാവുവരെയായ ബണ്ടി സന്ദീപ് കൗറിന്റെ ജീവിത കഥയാണ് പറയുന്നത്. രാജ്കുമാര്‍ റാവുവാണ് ചിത്രത്തിലെ മറ്റൊരു പ്രധാന താരം.
ക്വീന്‍ എന്ന ചിത്രത്തില്‍ അഭിനയിച്ചതുപോലെ വലിയ മേക്കപ്പൊന്നും ഇല്ലാതെയാണ് സിമ്രാനിലും കങ്കണ എത്തുന്നത്. ഷാഹിദ് എന്ന ചിത്രത്തിലൂടെ ദേശീയ പുരസ്കാരം സ്വന്തമാക്കിയ ഹന്‍സാല്‍ മേത്തയാണ് ചിത്രം സംവിധാനം ചെയ്യുന്നത്.
Post Your Comments