സൈന നേവാളിന്റെ ജീവിതകഥ പറയുന്ന ചിത്രത്തില്‍ സൈനയുടെ വേഷത്തില്‍ ശ്രദ്ധ കപൂര്‍ എത്തുന്നു. ബാഡ്മിന്റണ്‍ പാരമ്പര്യമുള്ള ദീപിക പദുക്കോണ്‍ ഉപേക്ഷിച്ച വേഷം ഉജ്വലമാക്കാനുള്ള ഒരുക്കത്തിലാണ് ശ്രദ്ധ കപൂര്‍. ഹാഫ് ഗേള്‍ഫ്രണ്ട് കഴിഞ്ഞാല്‍ ഇന്ത്യയുടെ ബാഡ്മിന്റണ്‍ സെന്‍സേഷന്‍ സൈന നേവാളിന്റെ ജീവിതകഥ പറയുന്ന ചിത്രത്തിലാണ് ശ്രദ്ധ അഭിനയിക്കുന്നത്.
എന്നാല്‍ ഹാഫ് ഗേള്‍ഫ്രണ്ടില്‍ ബാസ്‌ക്കറ്റ്‌ബോള്‍ കളിച്ചിട്ടുണ്ടെങ്കിലും അതുപോലെ അനായാസമല്ല സൈനയുടെ വേഷമെന്ന് ശ്രദ്ധ പറയുന്നു. സൈനയെപ്പോലൊരു പ്രൊഫഷണല്‍ താരമായി മാറാന്‍ എനിക്ക് ഏതാനും മാസങ്ങള്‍ മാത്രമാണുള്ളത്. എന്തായാലും ഇത് ഞാന്‍ ചെയ്യുന്ന ഏറ്റവും കടുപ്പമുള്ള വേഷമായിരിക്കും. എങ്കിലും ആ വെല്ലുവിളി ഏറ്റെടുക്കാന്‍ ഞാന്‍ ഒരുക്കമാണ്. ഹാഫ് ഗേള്‍ഫ്രണ്ട് പൂര്‍ത്തിയായിക്കഴിഞ്ഞാല്‍ ഉടനെ സൈനയുടെ ചിത്രത്തിനുവേണ്ടിയുള്ള ബാഡ്മിന്റണ്‍ പരിശീലനം ആരംഭിക്കും.
കുറേ നാള്‍ സൈനയ്‌ക്കൊന്നിച്ച് കഴിയണമെന്ന ആഗ്രഹമുണ്ട്. ഞങ്ങള്‍ ഇപ്പോള്‍ തന്നെ ഇതു സംബന്ധിച്ച് ആശയവിനിമയം ആരംഭിച്ചുകഴിഞ്ഞു-ശ്രദ്ധ പറഞ്ഞു. അമോല്‍ ഗുപ്തയാണ് മുന്‍ ലോക ഒന്നാം നമ്പര്‍ താരവും ഒളിമ്പിക് വെങ്കല മെഡല്‍ ജേതാവുമായ സൈനയുടെ ജീവിതം വെള്ളിത്തിരയില്‍ പകര്‍ത്തുന്നത്. സൈന എന്നു തന്നെയാണ് ചിത്രത്തിന്റെ പേര്.
Post Your Comments