പ്രണയത്തിനുവേണ്ടി ഉപേക്ഷിച്ച സിനിമാ ജീവിതത്തെക്കുറിച്ച് മാതു

അമരമെന്ന ചിത്രം കണ്ടവര്‍ ഒരിക്കലും മറക്കാത്ത ഒരു നടിയാണ് മാതു. മമ്മൂട്ടിയുടെ മകള്‍ മുത്തിനെ അനശ്വരമാക്കിയ മാതു എന്ന നടി സിനിമയില്‍ നിന്നും ഇപ്പോള്‍ അകന്നു കഴിയുകയാണ്. എന്തുകൊണ്ട് താന്‍ സിനിമ വിട്ടുവെന്ന് മാതു ഒരു മാധ്യമത്തിനു നല്‍കിയ അഭിമുഖത്തില്‍ വ്യക്തമാക്കുന്നു. പഠിച്ചു വലിയ ഡോക്ടറാകാന്‍ ആഗ്രഹിച്ചുഎന്നാല്‍ എത്തിയതു ക്യാമറയുടെ മുമ്പിലായിരുന്നു. കന്നഡ ചിത്രങ്ങളില്‍ ബാലതാരമായി അഭിനയ ജീവിതം ആരംഭിച്ച മാതു നെടുമുടി വേണു സംവിധാനം ചെയ്ത പൂരം എന്ന ചിത്രത്തിലൂടെയായിരുന്നു മലയാളത്തില്‍ എത്തിയത്. മലയാളത്തനിമയുള്ള ധാരാളം വേഷം ചെയ്ത ഇവര്‍ തമിഴ്, കന്നട, തെലുങ്ക് ഭാഷകളിലും അഭിനയിച്ചു.

സിനിമയില്‍ തിളങ്ങി നില്‍ക്കുന്ന സമയത്തായിരുന്നു ഡോ: ജാക്കോബിനെ കണ്ടുമുട്ടിയത്. പരിചയം പതിയേ പ്രണയത്തിനു വഴിമാറി. തുടര്‍ന്നു വീട്ടുകാരെ ധിക്കരിച്ച് അന്യമതസ്ഥനായ ജാക്കോബിനേ മാതു വിവാഹം കഴിച്ചു. 1999 ലായിരുന്നു അത്. ഇതിനു ശേഷം താരം മാതു എന്ന പേരു മാറ്റി മീന എന്ന പേരു സ്വീകരിക്കുകയും ചെയ്തു. വിവാഹ ശേഷം നല്ലൊരു ദാമ്പത്യജീവിതം സ്വപ്നം കണ്ട്കൊണ്ട് സിനിമ ഉപേക്ഷിച്ച് അമേരിക്കയിലേയ്ക്കു പോയി എങ്കിലും ഇരുവരുടേയും ദാമ്പത്യ ജീവിതം സുഖകരമായിരുന്നില്ല. ഇരുവര്‍ക്കുമിടയില്‍ ഉടലെടുത്ത അസ്വാരസ്യങ്ങള്‍ അവസാനിച്ചതു വിവാഹമോചനത്തിലായിരുന്നു. തുടര്‍ന്ന് 2012 ഇരുവരും വേര്‍പിരിഞ്ഞു.

15, 12 ഉം വയസുള്ള മക്കള്‍ക്കും അച്ഛനും അമ്മയ്ക്കും ഒപ്പം ഇവര്‍ ഇന്ന് ന്യൂയോര്‍ക്കിലാണ് താമസിക്കുന്നത്. നൃത്താഞ്ജലി എന്ന പേരില്‍ ഒരു ഡാന്‍സ് അക്കാദമിയും നടത്തിവരുന്നു. സാഹചര്യങ്ങള്‍ അനുകൂലമായാല്‍ സിനിമയിലേയ്ക്കു മടങ്ങിവരുമെന്ന് മാതു പറയുന്നു.