മലയാളത്തിലെ ബിഗ്‌ ബജറ്റ് ചിത്രമായി ഒരുങ്ങുന്ന എംടി വാസുദേവന്‍ നായരുടെ രണ്ടാമൂഴത്തില്‍ അമിതാഭ് ബച്ചന്‍ ഉണ്ടാകില്ലയെന്നു സൂചന. മോഹന്‍ലാലിനൊപ്പം ചിത്രത്തില്‍ ഭീഷ്മരായി അമിതാഭ് എത്തുന്നുവെന്ന വാര്‍ത്തകള്‍ അമിതാഭ് ബച്ചന്റെ വക്താവ് നിഷേധിച്ചു.
എംടി യുടെ തിരക്കഥയില്‍ മോഹന്‍ലാലിനെ നായകനാക്കി ശ്രീകുമാര്‍ സംവിധാനം ചെയ്യുന്ന രണ്ടാമൂഴത്തില്‍ അമിതാഭ് ബച്ചനും ഉണ്ടാകുമെന്ന വാര്‍ത്തകള്‍ വന്നിരുന്നു. സംവിധായകന്‍ ശ്രീകുമാര്‍ ഇക്കാര്യം സ്ഥിരീകരിക്കുകയും ചെയ്തിരുന്നു. എന്നാല്‍ ഇത് നിഷേധിക്കുന്ന റിപ്പോര്‍ട്ട് ആണ് ഇപ്പോള്‍ പുറത്തു വരുന്നത്.
സിനിമയില്‍ അമിതാഭ് ബച്ചന്‍ ഉണ്ടാകുമെന്ന തരത്തിലുള്ള വാര്‍ത്തകള്‍ തെറ്റാണെന്നും സിനിമയില്‍ ബച്ചന്‍ ഉണ്ടാകില്ലെന്നും അദ്ദേഹത്തിന്റെ വക്താവ് പുറത്തിറക്കിയ വാര്‍ത്താക്കുറിപ്പില്‍ വ്യക്തമാക്കി.
രാം ഗോപാല്‍ വര്‍മ്മയുടെ ആഗിനും മേജര്‍ രവിയുടെ കാണ്ഡഹാറിനും ശേഷം ബിഗ്ബിയും മോഹന്‍ലാലും വീണ്ടും ഒരുമികുമെന്നു പ്രതീക്ഷിച്ച ആരാധകരെ നിരാശയിലാഴ്ത്തിയിരിക്കുകയാണ് ഈ വാര്‍ത്ത.
എം ടി വാസുദേവന്‍ നായരുടെ നോവലിന്റെ ചലച്ചിത്രാവിഷ്കാരമാണ് രണ്ടാമൂഴം. അതില്‍ ഭീമനായി മോഹന്‍ലാല്‍ വേഷമിടുന്നു. 600 കോടി മുടക്കി നിര്‍മിക്കുന്ന ചിത്രം രണ്ട് ഭാഗമായാകും പുറത്തിറങ്ങുക.
Post Your Comments