കഴിഞ്ഞ ദിവസം ഓസ്കാര്‍ പ്രഖ്യാപനം നടന്നപ്പോള്‍ മലയാളത്തിലും നടന്നു ഒരു ഓസ്കാര്‍ പ്രഖ്യാപനം. പത്തേമാരിയുടെ സംവിധായകന്‍ സലിം അഹമ്മദ് തന്റെ പുതിയ ചിത്രത്തിന്റെ ടൈറ്റില്‍ പോസ്റ്റര്‍ പുറത്തുവിട്ടു. ‘ ആന്‍ഡ് ദ ഓസ്കാര്‍ ഗോസ് ടു’ എന്നു പേരിട്ടിരിക്കുന്ന ചിത്രം സിനിമയ്ക്കുള്ളിലെ സിനിമയാണ് കൈകാര്യം ചെയ്യുന്നത്.
സലിം അഹമ്മദ് രചനയും സംവിധാനവും, സഹനിർമ്മാണവും നിർവ്വഹിച്ച് 2011-ൽ പുറത്തിറങ്ങിയ ചിത്രമാണ് ആദാമിന്റെ മകൻ അബു. ദേശീയ പുരസ്കാരം നേടിയ ഈ ചിത്രത്തിന് ശേഷം കുഞ്ഞനന്തന്റെ കട, പത്തേമാരി എന്നീ രണ്ടു ചിത്രങ്ങള്‍ മമ്മൂട്ടിയെ നായകനാക്കി സംവിധായകന്‍ ഒരുക്കിയത്.
വീണ്ടും ഒരു മമ്മൂട്ടി ചിത്രമായിരിക്കുമെന്ന് ആരാധകര്‍ പ്രതീക്ഷിക്കുന്ന പുതിയ ചിത്രത്തില്‍ ദുല്‍ഖര്‍ സല്‍മാന്‍ സിനിമാ മോഹിയായ ചെറുപ്പക്കാരനായി എത്തുമെന്നാണ് റിപ്പോര്‍ട്ടുകള്‍. എന്നാല്‍ ഇക്കാര്യത്തില്‍ ഔദ്യോഗിക പ്രഖ്യാപനം നടത്തിയിട്ടില്ല. അഭിനേതാക്കളെയും സാങ്കേതിക പ്രവര്‍ത്തകരെയും പിന്നീട് അറിയിക്കുമെന്നാണ് സലിം അഹമ്മദ് പറയുന്നത്. സലിം അഹമ്മദിന്റേത് തന്നെയാണ് പുതിയ ചിത്രത്തിന്റെ തിരക്കഥ.
Post Your Comments