ഓരോ താരവും തന്റെ കരിയറില്‍ ടെലിവിഷന്‍ ചാനലുകളില്‍ അഭിനയിക്കാറുള്ളത് സ്വാഭാവികമാണ്. അങ്ങനെ ടെലിവിഷന്‍ ഷോകളിലൂടെ വളര്‍ന്നു ബോളിവുഡ് കീഴടക്കിയ താര രാജാവാണ് ഷാരൂഖ് ഖാന്‍.
ബോളിവുഡിലെ കിംഗ് ഖാന്‍ തന്റെ കരിയര്‍ ആരംഭിച്ചത് ടെലിവിഷന്‍ ഷോകളിലൂടെയായിരുന്നു. 1980കളില്‍ ദൂരദര്‍ശനില്‍ ഉണ്ടായിരുന്ന ഫൗജി എന്ന ജനപ്രിയ സീരിയലിലൂടെ അഭിനയ ജീവിതം തുടങ്ങിയ ഷാരൂഖ് സര്‍ക്കസ് എന്ന ഷോയിലൂടെ ടെലിവിഷന്‍ പ്രേക്ഷകരുടെ പ്രിയതാരമായി മാറി. പിന്നീടാണ് ബോളിവുഡിന്റെ തലപ്പത്തേക്ക് അദ്ദേഹം വളര്‍ന്നത്.
ഷാരൂഖിന്റെ ആരാധകരെ ആവേശത്തിലാക്കിയ സര്‍ക്കസ് പരമ്പര വീണ്ടും സംപ്രേക്ഷണത്തിന് ഒരുങ്ങുകയാണ്.ഫെബ്രുവരി 19 മുതല്‍ സര്‍ക്കസിന്റെ എപ്പിസോഡുകള്‍ വീണ്ടും പ്രദര്‍ശനത്തിന് എത്തുമെന്നാണ് ദൂരദര്‍ശന്‍ പുറത്ത് വിട്ട വാര്‍ത്ത. രാത്രി എട്ടു മണിക്കാണ് പരമ്പരയുടെ സംപ്രേക്ഷണം.
1989ല്‍ സംപ്രേക്ഷണം ചെയ്തിരുന്ന സര്‍ക്കസില്‍ ശേഖരന്‍ എന്ന മലയാളി സര്‍ക്കസ് ഉടമയായിട്ടായിരുന്ന കിംഗ് ഖാന്‍ അഭിനയച്ചത്. അച്ഛനില്‍ നിന്ന് പൈതൃകമായി കിട്ടുന്ന സര്‍ക്കസ് കമ്പനി മുന്നോട്ടു കൊണ്ടുപോകാന്‍ പാടുപെടുന്ന ശേഖരന്‍ എന്ന യുവാവിന്റെ കഥയാണ് പ്രമേയം. തുടക്കത്തില്‍ സര്‍ക്കസിനോട് വലിയ മമത ഇല്ലായിരുന്ന ശേഖരന്‍ പിന്നീട് അതിനെ സ്‌നേഹിച്ചു തുടങ്ങുന്നു. രേണുക ഷഹാനെ, അശുതോഷ് ഗോവരിക്കേര്‍, മിതാ വശിഷ്ത് എന്നിവരായിരുന്നു മറ്റു അഭിനേതാക്കാള്‍.
Post Your Comments