റിയല്‍ എസ്റ്റേറ്റ് ഇടപാടുമായി ബന്ധപ്പെട്ട് നടന്‍ കുഞ്ചാക്കോ ബോബനില്‍ നിന്നും പണം തട്ടിയെടുത്ത ഇടപാടുകാരന്‍ അറസ്റ്റില്‍. കട്ടപ്പന കാഞ്ചിയാര്‍ സ്വദേശി പി.ജെ. വര്‍ഗീസാണ് (46) അറസ്റ്റിലായത്. കടവന്ത്ര പൊലീസാണ് കട്ടപ്പനയില്‍നിന്നും ഇയാളെ അറസ്റ്റ് ചെയ്തത്. ഇരുപത്തിയഞ്ച് ലക്ഷം രൂപയാണ് ഇയാള്‍ കുഞ്ചാക്കോയില്‍ നിന്നും തട്ടിയെടുത്തത്. പ്രതിയെ കോടതിയില്‍ ഹാജരാക്കി.
മാസങ്ങള്‍ക്കുമുന്‍പ് നടന്ന ഇടപാടിനെക്കുറിച്ച് നാലു മാസം മുന്‍പാണ് കുഞ്ചാക്കോ ബോബന്‍ കടവന്ത്ര പൊലീസില്‍ പരാതി നല്‍കിയത്. പനമ്പിള്ളി നഗറില്‍ ബ്യൂട്ടി പാര്‍ലര്‍ നടത്തിയിരുന്ന വര്‍ഗീസ്, കുഞ്ചാക്കോ ബോബന്റെ പങ്കാളിത്തത്തോടെ എറണാകുളം പുത്തന്‍കുരിശില്‍ സ്ഥലം വാങ്ങാമെന്ന് പറഞ്ഞ് 25 ലക്ഷം രൂപ താരത്തിന്റെ കയ്യില്‍ നിന്നും വാങ്ങിയിരുന്നു. എന്നാല്‍, പലവിധ കാരണങ്ങളാല്‍ ഈ ഇടപാട് നടന്നില്ല. കുഞ്ചാക്കോ ബോബനില്‍നിന്ന് ഇയാള്‍ വാങ്ങിയ പണവും മടക്കി നല്‍കിയില്ല.
പലതവണ പണം ആവശ്യപ്പെട്ട് സമീപിച്ചെങ്കിലും ഇയാള്‍ ഒഴിഞ്ഞുമാറുകയായിരുന്നു. തുടര്‍ന്ന് നടന്‍ പരാതിയുമായി പൊലീസിനെ സമീപിക്കുകയായിരുന്നു.
Post Your Comments