നടിയ്ക്ക് നേരെ അസഭ്യവര്‍ഷം; ഓട്ടോ ഡ്രൈവർ അറസ്റ്റിൽ

ബുധനാഴ്ച അഞ്ചരയോടെ എംജി റോഡിൽ ചെന്നൈ സിൽക്സിനു സമീപത്തുനിന്നാണ് രശ്മി ഓട്ടോ വിളിച്ചത്. എസ്ആർഎം റോഡിലെ വീടുവരെയുള്ള യാത്രയ്ക്കു മീറ്ററിൽ കാണിച്ചത് 32 രൂപ. എന്നാൽ ഓട്ടോക്കാരൻ ആവശ്യപ്പെട്ടത് അറുപതു രൂപ. അമിത കൂലി നല്‍കാന്‍ സാധിക്കില്ല എന്ന് പറഞ്ഞ രശ്മിയോട് അയാള്‍ അസഭ്യം പറയുകയും ഓട്ടോയില്‍ നിന്നും ഇറങ്ങാന്‍ കഴിയാത്ത വിധം തടഞ്ഞു നിര്‍ത്തുകയും ചെയ്തു.

വഴിമുടക്കി നിന്ന ഓട്ടോ ഡ്രൈവറെ തള്ളിമാറ്റി വീട്ടിലേക്കു പ്രവേശിച്ചപ്പോഴും ഇയാൾ പിന്നാലെയെത്തി അസഭ്യം പറഞ്ഞു കൊണ്ടിരുന്നു. സമീപ വാസികള്‍ കൂടിയതോടെയാണ് ഇയാള്‍ പോയത്. തുടര്‍ന്ന് നോർത്ത് സ്റ്റേഷനിൽ രശ്മി പരാതി നൽകി. ഇന്നലെ രാവിലെ പ്രതിയെ പൊലീസ് അറസ്റ്റ് ചെയ്തെങ്കിലും ഉച്ചയോടെ ഇയാൾ ദേഹാസ്വാസ്ഥ്യങ്ങൾ പ്രകടിപ്പിച്ചു തുടങ്ങി.

സ്ത്രീത്വത്തെ അപമാനിക്കൽ, അസഭ്യഭാഷണം, ഭീഷണിപ്പെടുത്തൽ തുടങ്ങിയ വകുപ്പുകൾ ചുമത്തിയെങ്കിലും ഇയാൾക്ക് ഇന്നു വൃക്ക സംബന്ധമായ ശസ്ത്രക്രിയ നിശ്ചയിച്ചിരിക്കുന്നതിനാൽ ഇന്നലെ വൈകിട്ടോടെ മേലുദ്യോഗസ്ഥരുടെ അനുമതി വാങ്ങി എസ്ഐ പ്രതിയെ ജാമ്യത്തില്‍ വിട്ടയച്ചു.