മോഹൻലാലിനെ പ്രശംസിച്ച് മന്ത്രി ഡോ. തോമസ് ഐസക്ക്. മോഹൻ ലാൽ എന്ന മഹാനടൻറെ പ്രതിഭയെക്കുറിച്ച് താന്‍ പറയേണ്ടതില്ലെന്നും,കണ്ടതിനേക്കാൾ വലിയ കാഴ്ചയാകും അടുത്ത ലാല്‍ ചിത്രമെന്നും അദ്ദേഹം ഫേസ്ബുക്ക് പോസ്റ്റില്‍ കുറിക്കുന്നു. ഉത്രാടം തിരുനാള്‍ മാര്‍ത്താണ്ഡവര്‍മ്മയുടെ നാമധേയത്തിലുള്ള അവാര്‍ഡ് മോഹൻലാലിന് സമ്മാനിക്കുന്ന വേളയില്‍ ബ്ലോഗ് വിഷയം ഉള്‍പ്പടെയുള്ള വിവാദങ്ങളെക്കുറിച്ച് ചര്‍ച്ച ചെയ്തിരുന്നുവെന്നും മന്ത്രി വ്യക്തമാക്കി.
ഐസക് തോമസിന്‍റെ ഫേസ്ബുക്ക് പോസ്റ്റ്‌ വായിക്കാം
ഉത്രാടം തിരുനാള്‍ മാര്‍ത്താണ്ഡവര്‍മ്മയുടെ നാമധേയത്തിലുള്ള അവാര്‍ഡ് പത്മശ്രീ മോഹന്‍ലാലിന് നല്‍കുന്നതിന് ക്ഷണം ലഭിച്ചപ്പോള്‍ കൗതുകം തോന്നി.
മനോരമ ന്യൂസ് മേക്കര്‍ അവാര്‍ഡില്‍ പല വള്ളപ്പാടുകള്‍ അകലെ എന്നെ പിന്നിലാക്കി ലാല്‍ വിജയശ്രീലാളിതനായിട്ട് അധികനാള്‍ ആയില്ല. ഒരു സമാധാനം, എന്നെപ്പോലെതന്നെ പിന്നിലായിപ്പോയ രാജഗോപാലും ചടങ്ങില്‍ പ്രാസംഗികനായി ഉണ്ടായിരുന്നതാണ്. വളരെ ഹ്രസ്വമായ ഒരു പ്രസംഗം ഞാന്‍ നടത്തി.
മോഹൻ ലാൽ എന്ന മഹാനടൻറെ പ്രതിഭയെക്കുറിച്ച് ഞാൻ പറയേണ്ടതില്ല. പക്ഷേ, കണ്ടതിനേക്കാള്‍ വലിയ കാഴ്ച നാം കാണാനിരിക്കുന്നതേയുള്ളൂ. എംടിയുടെ രണ്ടാമൂഴത്തിൻറെ ചലച്ചിത്രാഖ്യാനം വരികയാണല്ലോ. ലാല്‍ എന്ന അഭിനയവിസ്മയം എം.ടി.യുടെ രണ്ടാമൂഴത്തിലെ ഭീമസേനന് എന്ത് പുതിയ വ്യാഖ്യാനമാണോ നല്‍കാന്‍ പോകുന്നത്!
സമീപകാലത്ത് സാമൂഹികമാധ്യമങ്ങളില്‍ ഉണ്ടായ വിവാദത്തെക്കുറിച്ചും ഞാന്‍ സൂചിപ്പിച്ചു. നോട്ടുനിരോധത്തെയും സിനിമാതീയറ്ററിലെ ദേശീയഗാനാലപത്തെയും ജെ.എൻ.യു പ്രശ്നത്തെയും ഒക്കെപ്പറ്റി അദ്ദേഹം എഴുതിയ അഭിപ്രായങ്ങള്‍ സാമൂഹികമാധ്യമങ്ങളില്‍ രൂക്ഷവിമർശനങ്ങൾ ഉണ്ടാക്കി. ഇക്കാര്യത്തിലെല്ലാം എന്റെ അഭിപ്രായങ്ങൾ അദ്ദേഹത്തിന്റെ അഭിപ്രായങ്ങൾക്കു കടകവിരുദ്ധമാണ്. അത് അദ്ദേഹത്തിന്റെ അഭിപ്രായം; ഇത് എന്റെ അഭിപ്രായം എന്ന നിലയിൽ കാണാനാണ് എനിക്ക് താല്പര്യം. അതാണു ജനാധിപത്യം. ഇക്കാര്യങ്ങളിലെന്നല്ല, എല്ലാ കാര്യത്തിലും അദ്ദേഹത്തിന് സ്വന്തം അഭിപ്രായം പറയാനുള്ള സ്വാതന്ത്ര്യമുണ്ട്. അവയെ വിമർശിക്കാൻ സകല പൗരർക്കും അതുപോലെതന്നെ സ്വാതന്ത്ര്യമുണ്ട്. വിമർശങ്ങൾ ആശയങ്ങളെയും നിലപാടുകളെയും പറ്റി ആകണം. അല്ലാതെ, അതുപറഞ്ഞ വ്യക്തിയെപ്പറ്റി ആകരുത്. ഒരു അഭിപ്രായം പറഞ്ഞാലുടനെ, ഒരു ആഹാരസാധനം കഴിച്ചാലുടനേ പാക്കിസ്താനിലേക്കു പോ, ഇസ്രായീലിലേക്കു പോ, എന്ന മട്ടിലുള്ള അസഹിഷ്ണുതയുടെയും വിദ്വേഷത്തിൻറെയും നിലയിലല്ല ആശയപരമായ സംവാദങ്ങൾ നടക്കേണ്ടത്. നോട്ടുനിരോധത്തെപ്പറ്റി പറയാൻ സാമ്പത്തികവിദഗ്ദ്ധനല്ലാത്തതുകൊണ്ട് എം.ടിക്ക് അവകാശമില്ല, അല്ലെങ്കിൽ, മറ്റേതെങ്കിലും കാര്യത്തിൽ അഭിപ്രായപ്രകടനം നടത്താത്തതുകൊണ്ട് എം.ടി ഇക്കാര്യത്തിൽ അഭിപ്രായം പറയാൻ പാടില്ല എന്നൊക്കെയുള്ള തരത്തിലെ നിലപാടുകൾ ജനാധിപത്യത്തിന്റേതല്ല. ഇതേ വാദങ്ങളുമായി ചില ആക്രമണങ്ങൾ മോഹൻലാലിനെതിരെയും കാണുകയുണ്ടായി. അക്കൂട്ടത്തിൽ ചേരേണ്ടെന്ന് തോന്നിയതുകൊണ്ടാണ് ഞാൻ ഒന്നും എഴുതാതിതിരുന്നത്,
വിമർശനങ്ങൾക്കും പിന്തുണയ്ക്കും മറുപടിയുമായി നടൻ മോഹൻലാലിന്റെ പുതിയ ബ്ലോഗ് ഞാന്‍ ചടങ്ങില്‍ വായിക്കുകയും ചെയ്തു.‘വിയറ്റ്നാമിലെ ഭിക്ഷുവിന്റെ വഴികൾ’ എന്നപേരിൽ എഴുതിയ പുതിയ ബ്ലോഗിലാണ് ലാൽ നിലപാട് വ്യക്തമാക്കിയത്. സെൻ ബുദ്ധസന്ന്യാസിയുടെ പുസ്തകത്തെക്കുറിച്ചും ബുദ്ധിസത്തെക്കുറിച്ചും പറഞ്ഞു തുടങ്ങിയ ബ്ലോഗിന്റെ അവസാന ഭാഗത്താണ് മോഹൻലാൽ തൻറെ നിലപാടുകൾ കൂട്ടിച്ചേർത്തത്.
‘ഞാൻ ബ്ലോഗുകൾ എഴുതാൻ തുടങ്ങിയതിൽപ്പിന്നെ പല വിഷയങ്ങളിലും ഞാൻ അഭിപ്രായം പറഞ്ഞിട്ടുണ്ട്. അവയെല്ലാം ഞാൻ എന്ന മനുഷ്യന്റെ മധ്യത്തിൽ നിന്നാണ് എഴുതിയത്. എന്നാൽ, പലരും അത് പല തരത്തിലാണ് എടുത്തത്. ഞാനെന്ന മനുഷ്യൻ എപ്പോഴും നടുവിലാണ് നിൽക്കുന്നത്. എങ്ങോട്ടും ചായ്‍വുകളില്ലാതെ, എന്റെ അഭിപ്രായങ്ങൾ ആളുകൾ അവർക്കാവശ്യമുള്ള തരത്തിൽ വ്യാഖ്യാനിക്കുന്നു.
ഹാൻ പറഞ്ഞതുപോലെ some times people have a certain idea or way of looking at things, and they want to put you in a box.. എന്നെ അഭിനന്ദിക്കുന്നു, എന്നോട് കലഹിക്കുന്നു, എന്നെ ചീത്തവിളിക്കുന്നു.. അപ്പോഴും ഞാൻ തിച് നാത് ഹാൻ നിന്നതുപോലെ എന്റെ ഉള്ളകത്തിൽ ഉറച്ചു നിൽക്കുന്നു. ഉറച്ച് ഒരു കാറ്റിലുമിളകാതെ നിൽക്ക്ന്നു. അതുകൊണ്ട് ഒന്നും എന്നെ ബാധിക്കുന്നില്ല. എല്ലാം കടന്നുപോകും ശാന്തമായിതന്നെ’.
ഇത്തരമൊരു ഭാവം നല്ലതുതന്നെ. ആക്ഷേപങ്ങളോടും അവഹേളനങ്ങളോടും നിസ്സംഗത പാലിക്കാന്‍ കഴിയണം. എന്റെ പോസ്റ്റുകള്‍ക്ക് കീഴില്‍ രണ്ട് മാസമായി സംഘികള്‍ നടത്തുന്ന പുലയാട്ടുകളോട് ഞാന്‍ സ്വീകരിക്കുന്ന സമീപനം ഇതാണ്. പക്ഷേ ഗൗരവമായ ഏത് സംവാദത്തിനും നാം സദാസന്നദ്ധമായിരിക്കുകയും വേണം. അതിലൂടെ മാത്രമേ മുന്നോട്ട് പോകാനാകൂ.
Post Your Comments