(വേറിട്ട സിനിമാ ചിന്തകള്‍)
മലയാള സിനിമയ്ക്ക് ഒരുപാട് ഹിറ്റുകള്‍ സംഭാവന ചെയ്ത സത്യന്‍ അന്തിക്കാടിന്റെ ആദ്യ ചിത്രം 1982- ല്‍ പുറത്തിറങ്ങിയ ‘കുറുക്കന്റെ കല്യാണ’മായിരുന്നു. സുകുമാരന്‍ നായകനായി അഭിനയിച്ച സത്യന്‍ അന്തിക്കാടിന്റെ പ്രഥമ ചിത്രം വലിയൊരു ബോക്സ്ഓഫീസ് വിജയമായിരുന്നു. പിന്നീട് മോഹന്‍ലാലിനെ നായകനാക്കി നിരവധി ഹിറ്റ് സിനിമകള്‍ സംവിധാനം ചെയ്ത സത്യന്‍ അന്തിക്കാട് മലയാളികളുടെ ഇഷ്ടസംവിധാകനായി മാറി. കുടുംബ ചിത്രങ്ങളുടെ സൂത്രധാരനായ സത്യന്‍ അന്തിക്കാടിന്റെ പേര് മാത്രം നോക്കി പ്രേക്ഷകര്‍ സിനിമാ ശാലകളിലേക്ക് ഒഴുകാന്‍ തുടങ്ങി. മോഹന്‍ലാലും, മമ്മൂട്ടിയും ജയറാമുമൊക്കെ സത്യന്‍ അന്തിക്കാട് ചിത്രങ്ങളിലൂടെ പ്രേക്ഷക സ്വീകാര്യത നേടിയെടുത്തു. പുതുതലമുറയില്‍പ്പെട്ട നായകന്മാര്‍ക്കൊപ്പവും കൈകോര്‍ത്ത് സത്യന്‍ അന്തിക്കാട് ഹിറ്റുകള്‍ രചിച്ചു.
ഫഹദ് ഫാസിലിനെ നായകനാക്കി 2014 ഒരുക്കിയ ഇന്ത്യന്‍ പ്രണയ കഥ വന്‍ഹിറ്റായി മാറിയപ്പോള്‍ നിവിന്‍പോളിക്കൊപ്പം ഒന്നിച്ച ‘പുതിയ തീരങ്ങള്‍’ പ്രദര്‍ശന വിജയം നേടാതെപോയി.
യുവനിരയിലെ സൂപ്പര്‍താരം ദുല്‍ഖര്‍ സല്‍മാന്‍ നായകനാകുന്ന ‘ജോമോന്റെ സുവിശേഷങ്ങള്‍’ എന്ന സത്യന്‍ ചിത്രം പ്രദര്‍ശനത്തിനെത്തുന്നതോടെ മലയാളത്തിലെ ഒട്ടുമിക്ക യുവ താരങ്ങള്‍ക്കൊപ്പവും ഈ അന്തിക്കാട്ടുകാരന്‍ വര്‍ക്ക് ചെയ്തു കഴിഞ്ഞു. ജയറാം നായകനായ ‘കഥ തുടരുന്നു’എന്ന ചിത്രത്തില്‍ യുവതാരം ആസിഫ് അലിക്ക് ശ്രദ്ധേയമായ ഒരു വേഷം അവതരിപ്പിക്കാനുള്ള അവസരം സത്യന്‍ അന്തിക്കാട് നല്‍കിയിരുന്നു. ചെറിയ കഥാപാത്രമാണെങ്കില്‍ പോലും അസിഫ് അലിയുടെ കരിയറിന് ബ്രേക്ക് നല്‍കിയ ചിത്രമായിരുന്നു ‘കഥ തുടരുന്നു’.
ആസിഫ് അലി, നിവിന്‍ പോളി, ഫഹദ് ഫാസില്‍ ,ദുല്‍ഖര്‍ സല്‍മാന്‍ തുടങ്ങി എല്ലാ യുവ താരങ്ങള്‍ക്കൊപ്പവും ഒന്നിച്ച സത്യന്‍ അന്തിക്കാട് തന്റെ ആദ്യ സിനിമയിലെ നായകന്‍റെ മകനായ പൃഥ്വി രാജിനെ മാത്രം നായകനാക്കി സിനിമ ചെയ്തിട്ടില്ല. സത്യന്‍ അന്തിക്കാടും പൃഥ്വി രാജും കൈകോര്‍ക്കുന്ന സിനിമ ഉടന്‍തന്നെ ഉണ്ടാകുമെന്ന് പ്രതീഷിക്കാം.
Post Your Comments