“സമ്പൂർണ്ണ സ്നേഹം” പ്രകാശനം ചെയ്തു

ഈസ്റ്റ് കോസ്റ്റ് ആഡിയോസിലൂടെ പ്രസിദ്ധീകരിക്കപ്പെട്ട ഈ വർഷത്തെ ക്രിസ്മസ് ആൽബമായ ‘സമ്പൂർണ്ണ സ്നേഹം’ സി ഡി പ്രകാശനം പ്രശസ്ത ഗായിക കെ.എസ്.ചിത്ര നിർവ്വഹിച്ചു. സംഗീത സംവിധായകനും, ഗായകനുമായ ശരത്, കെ.എസ്.ചിത്രയിൽ നിന്നും ആദ്യ സി ഡി ഏറ്റു വാങ്ങി. തിരുവനന്തപുരം അതിരൂപത വൈദികരായ ഡൈസനച്ചന്റെയും, ജിബു അച്ചന്റെയും നേതൃത്വത്തിൽ പ്രവർത്തിക്കുന്ന ‘കളർ പ്ലസ് ക്രിയേറ്റിവ്‌സ്’ എന്ന കൂട്ടായ്മയാണ് ഈ ആൽബത്തിന്റെ പിന്നണിയിൽ പ്രവർത്തിച്ചിരിക്കുന്നത്.

ധ്യാനാത്മകമായ വരികൾ കൊണ്ടും വ്യത്യസ്തമായ സംഗീതം കൊണ്ടും ശ്രദ്ധേയമാണ് ഈ ആൽബത്തിലെ മുഴുവൻ ഗാനങ്ങളും. അനശ്വരങ്ങളായ നിരവധി ക്രിസ്തീയഗാനങ്ങൾ രചിച്ച ഫാ.ജോസഫ് പാറാങ്കുഴി, ജിജോ പാലോട്, റവ ഡോ.ഡൈസൻ, ഫാ.ജിബു എന്നിവരുടേതാണ് വരികൾ. ഈസ്റ്റ് കോസ്റ്റിലൂടെ പുറത്തിറങ്ങിയ ‘മുക്തി’ എന്ന ആൽബത്തിലൂടെ ശ്രദ്ധേയനായ നവാഗത സംഗീത സംവിധായകനും, സൗണ്ട് എഞ്ചിനിയറുമായ ഷാജി ജൂസ ജേക്കബ്, ഡെൽറ്റസ് തെക്കേലുങ്കൽ, ജോണി.സി, ഫാ.ബിനോജ് മുളവരിക്കൽ, ഫാ.ആന്റോ ഡിക്‌സൺ, ഫാ.ജിബു എന്നിവർ സംഗീതം നൽകിയിരിക്കുന്നു.

ശരത്തിനൊപ്പം കെ.ജി.മാർക്കോസ്, കെസ്റ്റർ, ബിജു നാരായണൻ, സുധീപ് കുമാർ, അൻവർ സാദത്, വിത്സൺ പിറവം, ഗാഗുൽ ജോസഫ്, ഫാ.ജിബു, ഷാജി, ശ്വേതാ മോഹൻ, സപ്തപർണ്ണ, നീനു എന്നിവരും ഗാനങ്ങൾ ആലപിച്ചിരിക്കുന്നു.