ലോകം മുഴുവന്‍ ആരാധകരെ നേടിയ ജെയിംസ്ബോണ്ട് സൂപ്പര്‍ഹിറ്റുകളുടെ സ്റ്റണ്ട് മാസ്റ്റര്‍ സ്റ്റീവ് ട്രുഗിളിയ ഹെലികോപ്റ്ററില്‍ നിന്നു വീണു മരിച്ചു. വ്യാഴാഴ്ച ചൈനയിലെ ചോംഗ് ക്വിംഗ് അബ്സെയില്‍ റേസിനിടയില്‍ 300 അടി താഴേയ്ക്ക് വീഴുകയായിരുന്നു. പാരച്യൂട്ടില്‍ വിമാനത്തില്‍ നിന്നും ചാടുകയും അപകടകരമായ പര്‍വ്വതാരോഹണം നടത്തുകയും ചെയ്യുന്ന സ്റ്റണ്ടിലൂടെ പ്രശസ്തനാണ് 54 കാരനായ സ്റ്റീവ്. നിരവധി പുരസ്കാരങ്ങളും റെക്കോര്‍ഡുകളും നേടിയെടുത്തിട്ടുണ്ട്. ഹെലികോപ്റ്ററില്‍ നിന്നും 100 മീറ്റര്‍ വേഗത്തില്‍ ചാടുന്നയാളെന്ന റെക്കോഡ് സ്റ്റീവിനു മാത്രം അവകാശപ്പെട്ടതാണ്. ഹോളിവുഡ് സൂപ്പര്‍ഹിറ്റുകളായ പീയേഴ്സ് ബ്രോസ്നന്‍ നായകനായ ജെയിംസ് ബോണ്ട് ചിത്രങ്ങള്‍ ടുമാറോ നെവര്‍ ഡൈസ്, വേള്‍ഡ് ഈസ് നോട്ട് ഇനഫ് സിനിമകളിലും സ്റ്റീവന്‍ സ്പീല്‍ ബര്‍ഗിന്‍റെ യുദ്ധചിത്രം സേവിംഗ് പ്രൈവറ്റ് റയാനിലും ഉള്ള അതിസാഹസിക രംഗങ്ങള്‍ സ്റ്റീവിന്‍റെ പ്രകടനമാണ്. സംഭവവുമായി ബന്ധപ്പെട്ട കൂടുതല്‍ വിവരങ്ങള്‍ ചൈനീസ് അധികൃതര്‍ പുറത്തുവിട്ടിട്ടില്ല.
Post Your Comments