പി.അയ്യപ്പദാസ് കുമ്പളത്ത്
സല്ലാപത്തിലൂടെ പ്രേക്ഷകമനസില്‍ നായിക സങ്കല്‍പ്പങ്ങള്‍ക്ക് പുതിയ രൂപഭാവങ്ങള്‍ പകര്‍ന്ന ശാലീന സുന്ദരി. അമ്മമാര്‍ക്ക് സ്വന്തം മകളായും യുവാക്കള്‍ക്ക് ഹരം പകര്‍ന്നും ഹൃദയത്തില്‍ ഇടം നേടി അവള്‍ വളര്‍ന്നു. എഴുത്തുകാരന്റെ കഥാപാത്രങ്ങള്‍ക്ക് മിഴിവാര്‍ന്ന് ജീവനും ജീവിതവുമേകിയപ്പോള്‍ ആ പ്രതിഭയ്ക്കു മുന്നില്‍ സംവിധായകന്‍പോലും ‘കട്ട്’ പറയാന്‍ മറന്നു. മലയാളത്തിന്റെ സ്വന്തം ലേഡി സൂപ്പര്‍ സ്റ്റാര്‍, മഞ്ജു വാര്യര്‍. വിവാഹ ജീവിതത്തോടെ മഞ്ജു സിനിമ ജീവിതത്തിന് ഇടവേള സമ്മാനിച്ചത് പ്രേക്ഷകരെ കുറച്ചൊന്നുമല്ല നിരാശയിലാക്കിയത്.
ഒടുവില്‍ പ്രേക്ഷകര്‍ കാത്തിരുന്ന ആ ദിവസം വന്നു. 14 വര്‍ഷങ്ങള്‍ക്ക് ശേഷം. അഭിനയ ചക്രവര്‍ത്തിനിയുടെ തിരിച്ചുവരവ് മലയാളി ആഘോഷമാക്കി. 14 വര്‍ഷങ്ങള്‍ക്കു ശേഷം തിയറ്ററുകളിലേക്കുപോലും മടങ്ങി എത്തിയവര്‍ എത്രയോ. പക്ഷെ, ഒരു സംശയം മാത്രം ബാക്കി. മഞ്ജു വാര്യരെ കാണാന്‍ കൊതിക്കുന്ന വേഷങ്ങളിലാണോ ഈ മടങ്ങി വരവ്?
ആറാംതമ്പുരാനിലെ നാട്ടിന്‍പുറത്തിന്റെ നൈര്‍മല്യവും ഇത്തിരി ചട്ടമ്പിത്തരവുമൊക്കെയുള്ള ഉണ്ണിമായ, സ്ത്രീത്വത്തിന്റെ കരുത്തുമായി അവതരിച്ച കന്മദത്തിലെ ഭാനുമതിയും കണ്ണെഴുതി പൊട്ടുംതൊട്ടിലെ ഭദ്രയും പ്രണയം ജീവിതമായി കാണുന്ന പെണ്‍മനസിന്റെ പ്രതീകമായ കൃഷ്ണഗുഡിയില്‍ ഒരു പ്രണയകാലത്തിലെ മീനാക്ഷി, സല്ലാപത്തിലെ രാധയും പിന്നെ പ്രണയവര്‍ണങ്ങളിലെ ആരതിയും. കുടുംബിനിയായ കളിവീടിലെ മൃദുലയും ഇരട്ടക്കുട്ടികളുടെ അച്ഛനിലെ അനുപമയും തുടങ്ങി എത്ര എത്ര കഥാപാത്രങ്ങള്‍. കുടുംബിനിയായും കാമുകിയായും കൂട്ടുകാരിയായും നാട്ടിന്‍മ്പുറത്തുകാരിയായുമൊക്കെ മഞ്ജു നിറഞ്ഞാടുമ്പോള്‍ മലയാളി അനുഭവിച്ചറിഞ്ഞ ആസ്വാദന സുഖം. ആ സൗന്ദര്യമായിരുന്നു മലയാളിയുടെ മനസില്‍ മഞ്ജു വാര്യര്‍ക്ക് ഇടം നല്‍കിയതും തിരിച്ചു വരണമെന്നാഗ്രഹിപ്പിച്ചതും.
റോഷന്‍ ആന്‍ഡ്രൂസ് ചിത്രമായ ഹൗ ഓള്‍ഡ് ആര്‍ യുവുല്‍ നിരുപമ രാജീവെന്ന മുപ്പത്താറുകാരിയായി മഞ്ജു എത്തിയപ്പോള്‍ മലയാളി ആശ്വാസിച്ചു. മകളെ കുറിച്ചോര്‍ത്താശങ്കപ്പെടുന്ന അമ്മയായും സ്‌നേഹനിധിയായ ഭാര്യയായും ഉത്തരവാദിത്വബോധമുള്ള കുടുംബിനയായും നിരുപമ എത്തിയപ്പോള്‍ പ്രേക്ഷകര്‍ നിറഞ്ഞ മനസുമായി തിയറ്റര്‍ വിട്ടിറങ്ങി. ഇതിന്റെ തുടര്‍ച്ച നല്‍കാന്‍ മഞ്ജുവിനായോ എന്ന സംശയം പിന്നേയും ചോദിക്കാതെ വയ്യ. തനിക്കു ലഭിക്കുന്ന ഏതു വേഷത്തേയും ഉള്‍ക്കൊണ്ട് അനായാസമായ വഴക്കത്തോടെ അഭിനയിക്കാന്‍ മഞ്ജുവിന് ഇന്നും കഴിയുന്നുണ്ട്. എന്നാല്‍ മലയാളി പ്രതീക്ഷിക്കുന്ന മഞ്ജു വാര്യര്‍ കഥാപാത്രങ്ങളെ കാണാന്‍ മടങ്ങി വരവില്‍ പൂര്‍ണമായും കഴിഞ്ഞിട്ടില്ല. പ്രേക്ഷക മനസില്‍ ഇടം നേടിയ മഞ്ജു വാര്യര്‍ കഥാപാത്രങ്ങളില്‍ കാണുന്ന ചില പൊതുവായ സവിശേഷതകള്‍. അത്തരം കഥാപാത്രങ്ങളെയാണ് പ്രേക്ഷകര്‍ ഇന്നും കൊതിക്കുന്നത്. മഞ്ജു വാര്യര്‍ കഥാപാത്രത്തെ ആസ്വദിച്ചറിഞ്ഞ സംവിധായകരും തിരക്കഥാകൃത്തുക്കളും എന്തേ ഈ യാഥാര്‍ത്ഥ്യം മറന്നു പോകുന്നു? പ്രേക്ഷകര്‍ കൊതിക്കുന്നത് അതാണ്, മലയാള സിനിമാ സാമ്രാജ്യത്തെ ഞെട്ടിച്ച്, ലോക സിനിമാ വേദിയെ ഭ്രമിപ്പിച്ച് ദൈവം കൈതൊട്ടനുഗ്രഹിച്ച മഞ്ജു വാര്യരെന്ന താരരാഞ്ജിയുടെ വരവിനായി.
Post Your Comments