ബിജു മേനോനെ നായകനാക്കി വി.കെ പ്രകാശ്‌ ഒരുക്കുന്ന ചിത്രമാണ് ‘മരുഭൂമിയിലെ ആന’. ചിത്രത്തിലെ ആദ്യ വീഡിയോ ഗാനം പുറത്തിറങ്ങി. സര്‍ഗം വിടരും എന്ന് തുടങ്ങുന്ന മനോഹര ഗാനം ആലപിച്ചിരിക്കുന്നത് വിജയ്‌ യേശുദാസാണ്. ബി.കെ ഹരിനാരായണന്റെ വരികള്‍ക്ക് രതീഷ്‌ വേഗ ഈണം പകര്‍ന്നിരിക്കുന്നു.
ബിജുമേനോന്‍ അറബിവേഷത്തിലെത്തുന്ന ഈ ചിത്രത്തില്‍ സംസ്‌കൃതി ഷേണായിയും സനുഷയുമാണ് നായികമാര്‍. സുഹൃത്തിനൊപ്പം ഷെയ്ഖ് കേരളത്തിലെത്തുന്നതും തുടര്‍ന്നുള്ള രസകരമായ മുഹൂര്‍ത്തങ്ങളുമാണ് ചിത്രത്തിന്റെ ഇതിവൃത്തം. സൗഹൃദം പ്രമേയമാക്കിയ പക്കാ എന്റര്‍ടെയിനറായാണ് സംവിധായകന്‍ ചിത്രം ഒരുക്കിയിരിക്കുന്നത്. ദോഹയിലും തൃശൂരിലും ഇരിങ്ങാലക്കുടയിലുമായാണ് ചിത്രീകരണം പൂര്‍ത്തിയാക്കിയത്. ലാലു അലക്സ്, പാഷാണം ഷാജി, മേജര്‍ രവി, ഹരീഷ് തുടങ്ങിയവരാണ് ചിത്രത്തിലെ മറ്റുപ്രധാന താരങ്ങള്‍.
ഡേവിഡ്‌ കാച്ചപ്പിള്ളി പ്രോഡക്ഷന്‍സിന്റെ ബാനറില്‍ ഡേവിഡ്‌ കാച്ചപ്പിള്ളി നിര്‍മ്മിക്കുന്ന ചിത്രത്തിന്റെ തിരകഥയൊരുക്കിയിരിക്കുന്നത് വൈ.വി രാജേഷാണ്. കഥ ശരത്ചന്ദ്രന്‍ വയനാടിന്റെതാണ്. അജയ് ഡേവിഡ്‌ കാച്ചപ്പിള്ളി ഛായാഗ്രഹണവും വി.സാജന്‍ ചിത്രസംയോജനവും നിര്‍വഹിച്ചിരിക്കുന്നു. കലാസംവിധാനം: സുജിത് രാഘവ്, പ്രൊഡക്ഷന്‍ കണ്‍ട്രോളര്‍: ബെന്നി കട്ടപ്പന. ചിത്രം ഉടന്‍ ചാന്ദ് വി ക്രീയേഷന്‍സ് കേരളത്തിലെ തീയറ്ററുകളില്‍ പ്രദര്‍ശനത്തിനെത്തിക്കും.
Post Your Comments