രജനീകാന്ത് ആരാധകരെ വിമര്‍ശിച്ച് കൊണ്ട് ബോളിവുഡ് സംവിധായകന്‍ രാം ഗോപാല്‍ വര്‍മ്മ രംഗത്ത്. തന്റെ ഒരു ട്വീറ്റിനോടുള്ള രജനിയുടെ ആരാധകരുടെ പ്രതികരണമാണ് രാംഗോപാൽ വർമ്മയെ ദേഷ്യത്തിലാക്കിയത്. കഴിഞ്ഞ ദിവസം രജനീകാന്തിനൊപ്പം നില്‍ക്കുന്ന ചിത്രം ഏമി ജാക്‌സണ്‍ ട്വീറ്റ് ചെയ്തിരുന്നു. ഈ ചിത്രം തന്റെ അക്കൗണ്ടില്‍ ഷെയര്‍ ചെയ്ത് കൊണ്ട് രാം ഗോപാല്‍ വര്‍മ്മ നടത്തിയ ചില പരാമര്‍ശങ്ങള്‍ രജനിയുടെ ആരാധകർ മറ്റൊരു തരത്തിലാണ് സ്വീകരിച്ചത്. ചില ആരാധകർ രാം ഗോപാല്‍ വര്‍മ്മയെ നിശിതമായി വിമര്‍ശിക്കുകയും ചീത്ത വിളിക്കുകയും ചെയ്തു. ഇതിന് മറുപടിയായിട്ടാണ് രജനീകാന്തിനെ താന്‍ പ്രശംസിക്കുകയായിരുന്നു എന്നും ചവറുകളായ ഫാന്‍സിന് മനസ്സിലായില്ലെന്ന് രാംഗോപാല്‍ വര്‍മ്മ പറഞ്ഞത്. രജനീകാന്ത് സ്വയം കളിയാക്കുന്ന ഒരു വീഡിയോയും രാംഗോപാല്‍ വര്‍മ്മ ഷെയര്‍ ചെയ്തിട്ടുണ്ട്. താരപദവിക്ക് ലുക്ക്‌സ് നിര്‍ണായകമല്ലെന്ന് തെളിയിച്ച വലിയ താരം, സിക്‌സ് പാക്കില്ലാത്ത, ഉയരമില്ലാത്ത രണ്ട് ഡാന്‍സ് സ്റ്റെപ്പുകള്‍ മാത്രം അറിയാവുന്ന മനുഷ്യന്‍, ലോകത്തൊരിടത്തും ഈ ലുക്കുള്ള ഒരാള്‍ക്ക് സൂപ്പര്‍സ്റ്റാറാകാന്‍ സാധിക്കില്ല- ഇദ്ദേഹം ഇതിനായി എന്താണ് ദൈവത്തിന് നല്‍കിയത്, പ്രേക്ഷകര്‍ക്ക് സിനിമയില്‍ എന്താണ് ഇഷ്ടപ്പെടുന്നത് എന്ന് നിശ്ചയിക്കാൻ കഴിയില്ല എന്നതിന്റെ ഏറ്റവും വലിയ തെളിവാണ് രജനീസാര്‍, രജനീ പ്രതിഭാസം എന്താണെന്ന് വിശദീകരിക്കാന്‍ ലോകത്തെ ഏറ്റവും വലിയ മന:ശാസ്ത്രജ്ഞര്‍ക്ക് പോലും സാധിക്കില്ല. തുടങ്ങിയ പരാമര്‍ശങ്ങളാണ് രാം ഗോപാല്‍ വര്‍മ്മ ട്വിറ്ററില്‍ നടത്തിയത്.
Post Your Comments