1988-ല്‍ റിലീസ് ചെയ്ത മലയാള ചിത്രം “ധ്വനി” യുടെ ഒരുപിടി സവിശേഷതകള്‍

നിത്യഹരിത നായകനായ പ്രേം നസീറിന്റെ അവസാന ചിത്രം കൂടിയായിരുന്നു ഇത്. രാജശേഖരൻ നായർ എന്ന കഥാപാത്രത്തെയാണ് അദ്ദേഹം ഈ സിനിമയിൽ അവതരിപ്പിച്ചത്. ഈ ചിത്രത്തിൽ ശോഭന അവതരിപ്പിച്ച ദേവി എന്ന കഥാപാത്രത്തിന്റെ അച്ഛനായാണ്‌ അദ്ദേഹം വേഷമിട്ടത്. ‘മരുന്നും വേണ്ട, മന്ത്രവും വേണ്ട, ഒന്നു മരിച്ചു കിട്ടിയാൽ മതി’ എന്നൊരു ഡയലോഗ് അദ്ദേഹം ഈ ചിത്രത്തിൽ പറയുന്നുണ്ട്. അത് അദ്ദേഹത്തിന്റെ ഒടുവിലത്തെ ഡയലോഗായാണ് കണക്കാക്കുന്നത്. വൈക്കം മുഹമ്മദ്‌ ബഷീർ അഭിനയിച്ച ചലച്ചിത്രം എന്ന ഖ്യാതിയും ഈ സിനിമയ്ക്ക് സ്വന്തമാണ്. ബഷീർ ആയിത്തന്നെയാണ്‌ അദ്ദേഹം ഈ ചിത്രത്തിൽ വേഷമിട്ടത്.

മാക് പ്രൊഡക്ഷൻസിന്റെ ബാനറിൽ അംജത് അലി എന്ന പതിനൊന്നു വയസ്സുകാരനാണ് ഈ ചിത്രം നിർമ്മിച്ചത്. മന്ത്രിയായ മഞ്ഞളാം കുഴി അലിയുടെ മകനായ അംജത് അലി തന്റെ മുപ്പത്തിയേഴാം വയസ്സിൽ നിര്യാതനായി.