രജിനീകാന്തിന്റെ രാഷ്ട്രീയ പ്രവേശനം വീണ്ടും ചര്‍ച്ചയാകുന്നു. അഭ്യൂഹങ്ങള്‍ ഉയര്‍ത്തിക്കൊണ്ട് താരം വീണ്ടും ആരാധകരുമായി കൂടിക്കാഴ്ചയ്ക്കൊരുങ്ങുന്നു. ഡിസംബര്‍ 26 മുതല്‍ 31 വരെ കോടമ്പാക്കത്തുള്ള രാഘവേന്ദ്ര കല്യാണ മണ്ഡപത്തിലായിരിക്കും രജനീകാന്ത് ആരാധകരെ കാണുക. രാവിലെ എട്ടു മുതല്‍ ഉച്ചതിരിഞ്ഞ് മൂന്നുവരെയാണ് കൂടിക്കാഴ്ച. രാഷ്ട്രീയ പ്രവേശനം ചര്‍ച്ച കൊടുമ്പിരി കൊണ്ടിരുന്ന സമയത്തും സമാനമായ കൂടിക്കാഴ്ച രജനി നടത്തിയിരുന്നു.
രജനീകാന്ത് രാഷ്ട്രീയത്തില്‍ പ്രവേശിക്കുന്നുവെന്ന് പലപ്പോഴും വാര്‍ത്തകള്‍ വരാറുണ്ടായിരുന്നു. ഇക്കഴിഞ്ഞ മേയില്‍ നടന്ന ആരാധകസംഗമത്തില്‍, രാഷ്ട്രീയ പ്രവേശനത്തിനുള്ള സൂചന നല്‍കിയിരുന്നു. സംഗമത്തിന്റെ ആദ്യദിനം ‘ദൈവഹിതമുണ്ടെങ്കില്‍ താന്‍ രാഷ്ട്രീയത്തിലെത്തുമെന്നും ആര്‍ക്കും തടയാന്‍ സാധിക്കില്ലെന്നു’മാണ് രജനി വ്യക്തമാക്കിയത്. യുദ്ധം വരുമ്പോള്‍ നമുക്ക് ഒരുമിക്കാം എന്ന് പറഞ്ഞായിരുന്നു സൂപ്പര്‍സ്റ്റാര്‍ അന്ന് സംഗമം അവസാനിപ്പിച്ചത്.
തമിഴ് നാട് രാഷ്ട്രീയത്തില്‍ പല താരങ്ങളും തങ്ങളുടെ തട്ടകം സ്വന്തമാക്കിയിട്ടുണ്ട്. രജനിയ്ക്ക് പിന്നാലെ കമല്‍ ഹസനും തന്റെ രാഷ്ട്രീയ താത്പര്യം പ്രകടിപ്പിച്ചിരുന്നു.
Post Your Comments