അഴിമതി നടത്തി ഹെലികോപ്റ്ററൊക്കെ വാങ്ങിതരുന്ന അച്ഛനായിരുന്നെങ്കിൽ വിമർശനങ്ങളെ അവ​ഗണിച്ചേനെ: ​ഗോകുൽ സുരേഷ്

അച്ഛൻ സുരേഷ് ​ഗോപിക്കെതിരെ നടക്കുന്ന വിമർശനങ്ങളും പരിഹാസങ്ങളും സോഷ്യൽ മീഡിയ ആക്രമണങ്ങളുമെല്ലാം അജണ്ട സെറ്റ് ചെയ്തുള്ളതാണെന്ന് മകൻ ​ഗോകുൽ സുരേഷ്.

എല്ലാ അഴിമതിയും നടത്തി, ഒരു ഹെലിക്കോപ്റ്ററൊക്കെ മക്കൾക്ക് വാങ്ങി നൽകുന്ന അച്ഛനായിരുന്നു സുരേഷ് ​ഗോപിയെങ്കിൽ താനത് പോട്ടേയെന്ന് വെച്ചേനെയെന്നും താരം വ്യക്തമാക്കി. ഒരു തെറ്റും ചെയ്യാതെ വിമർശനങ്ങൾ വാങ്ങുന്ന ഒരാളാണ് അച്ഛനെന്നും ​ഗോകുൽ സുരേഷ് പറഞ്ഞു. പലപ്പോഴും സോഷ്യൽ മീഡിയയിൽ കൂട്ടമായി അച്ഛനെതിരെ വിമർശനങ്ങൾ ഉയരാറുണ്ട്, ഒറ്റക്കൊറ്റയ്ക്ക് വിമർശിക്കാനും രം​ഗത്ത് വരാനും നട്ടെല്ലുള്ളവർ കുറവാണ്, അതിന് ഭയമാണ്, ഇത്തരത്തിൽ ഒളിഞ്ഞിരുന്ന് പരിഹസിക്കുന്നവരാണ് കൂടുതലെന്നും ​ഗോകുൽ സുരേഷ്.

അമ്മയുടെയും സഹോദരിമാരുടേയും ചിത്രങ്ങളടക്കം സോഷ്യൽ മീഡിയയിൽ ഇട്ട് വൃത്തികേടുകൾ കാണിച്ചവർ അനവധിയാണ്, കുടുംബത്തിൽ ഉള്ള സ്ത്രീകൾക്കെതിരെ കൂടിയാണ് പലരും അവഹേളനം നടത്തുന്നത്. അച്ഛൻ ചേർന്നത് അച്ഛന് ഇഷ്ട്ടപ്പെട്ട പാർട്ടിയിലാണ്, അതിന് മറ്റുള്ളവർ അജണ്ട സെറ്റ് ചെയ്ത് ഈ രീതിയിൽ ആക്രമണം നടത്തുന്നത് ശരിയല്ലെന്നും ​ഗോകുൽ പറഞ്ഞു. ഒരിക്കൽ സോഷ്യൽ മീഡിയയിൽ ഒരാൾക്ക് താൻ മറുപടി നൽകേണ്ടി വന്നുവെന്നും ​ഗോകുൽ സുരേഷ് പറഞ്ഞു.