പൊന്നോമനയെ വരവേറ്റ് നടി അ‍ഞ്ജലി നായര്‍

നടി അ‍ഞ്ജലി നായര്‍ക്ക് പെൺകുഞ്ഞ് പിറന്നു. സോഷ്യൽ മീഡിയയിലൂടെ മകളുടെ ചിത്രം പങ്കുവച്ചുകൊണ്ടാണ് താരം സന്തോഷ വാര്‍ത്ത അറിയിച്ചത്. ഞങ്ങളുടെ പുതിയ കുടുംബാം​ഗത്തെ പോലെ ജീവിതം അദ്ഭുതങ്ങൾ നിറഞ്ഞതാണെന്നും എല്ലാവരുടേയും അനു​ഗ്രഹങ്ങൾ വേണമെന്നും അവർ ഇൻസ്റ്റാ​ഗ്രാമിൽ കുറിച്ചു.

കഴിഞ്ഞ നവംബറിലായിരുന്നു സഹസംവിധായകനായ അജിത് രാജുവുമായി അഞ്ജലിയുടെ വിവാഹം. ഇരുവരുടേയും രണ്ടാം വിവാഹമായിരുന്നു ഇത്. ആദ്യ വിവാഹത്തിൽ അഞ്ജലിക്ക് ആവ്നി എന്ന ഒരു മകളുണ്ട്. മകൾക്കും അജിത്തിനുമൊപ്പമുള്ള മെറ്റേണിറ്റി ഫോട്ടോഷൂട്ട് ചിത്രങ്ങളും അഞ്ജലി പങ്കുവച്ചിട്ടുണ്ട്.

Also Read: സസ്പെൻസ് നിറച്ച് ‘ബ്ലാക്ക് പാന്തർ: വഗാണ്ട ഫോർ എവർ’: ടീസർ എത്തി

മലയാളത്തിലും മറ്റ് തെന്നിന്ത്യൻ ഭാഷകളിലുമായി 125ലേറെ സിനിമകളിൽ അഞ്ജലി അഭിനയിച്ചിട്ടുണ്ട്. അഞ്ച് സുന്ദരികൾ, എബിസിഡി, ലൈല ഓ ലൈല, കമ്മട്ടിപ്പാടം, കനൽ, ഒപ്പം, പുലിമുരുകൻ, ടേക്ക് ഓഫ്, ദൃശ്യം 2, കാവൽ, അണ്ണാത്തെ തുടങ്ങിയവയാണ് പ്രധാന ചിത്രങ്ങൾ. ലാൽ ജോസ് ചിത്രം 41ൽ സഹസംവിധായകനായിരുന്ന അജിത്ത് സ്വതന്ത്ര സംവിധായകനാകാനുള്ള ഒരുക്കത്തിലാണ്. തമിഴ് സിനിമകളിലും അജിത്ത് പ്രവര്‍ത്തിച്ചിട്ടുണ്ട്.