കൊച്ചി: സ്‌കൂള്‍ വിദ്യാര്‍ത്ഥിയായ 11 വയസുകാരനെ ചൂരല്‍ കൊണ്ട് ശരീരമാസകലം മര്‍ദിച്ച രണ്ടാനച്ഛന്‍ പൊലീസ് പിടിയില്‍. ഇരിങ്ങാലക്കുട സ്വദേശി അരുണ്‍(33) ആണ് പിടിയിലായത്. ചേരാനെല്ലൂര്‍ പൊലീസാണ് പിടികൂടിയത്.
ബുധനാഴ്ചയാണ് സംഭവം. ചിറ്റൂരില്‍ കുട്ടിയുടെ അമ്മയുമായി വാടകയ്ക്ക് താമസിക്കുകയാണിവര്‍. ഇന്നലെ സ്‌കൂളില്‍ ചെന്നപ്പോള്‍ കുട്ടിയുടെ ശരീരത്തിലെ പാടുകള്‍ കണ്ട് അധ്യാപകര്‍ ചോദിച്ചപ്പോഴാണ് സംഭവം പുറത്തറിഞ്ഞത്. ആദ്യം കുട്ടി കാര്യങ്ങള്‍ പറയാന്‍ തയാറായില്ല. തുടര്‍ന്ന്, സ്‌കൂള്‍ അധികൃതര്‍ പൊലീസില്‍ അറിയിച്ചതിനെ തുടര്‍ന്ന്, പൊലീസെത്തി കുട്ടിയെ ആശുപത്രിയില്‍ പ്രവേശിപ്പിച്ച ശേഷം ചോദിച്ചപ്പോഴാണ് കാര്യങ്ങള്‍ പറഞ്ഞത്.
ദേഷ്യം വരുമ്പോള്‍ അച്ഛന്‍ പതിവായി തന്നെ തല്ലാറുണ്ടെന്ന് കുട്ടി പൊലീസിനോട് വ്യക്തമാക്കി. കുട്ടിയുടെ ഇരു കൈകളിലും തുടയിലും മുതുകിലും നെഞ്ചത്തും ചൂരല്‍ കൊണ്ട് അടിച്ചതിന്‍റെ പാടുകളുണ്ട്.
പഠിക്കാന്‍ പിന്നിലായതിനാല്‍ മര്‍ദിച്ചുവെന്നാണ് അരുണും കുട്ടിയുടെ മാതാവും പറയുന്നത്. കുട്ടിയെ ചൈൽഡ്ഹോമിലേ ക്ക് മാറ്റി. അറസ്റ്റിലായ അരുണിനെ ഇന്ന് കോടതിയില്‍ ഹാജരാക്കും.
Post Your Comments